Wir graf Hans von Habspu^erg veriehen vnd tu^en chund offenlich vmb den bri^ef, den der hochgebor^en fúrst vnser || gnediger herr hertzog Albr. ze Oster. ze Steyr vnd ze Kernden geben hat vns vnd vnser stat vnd den purgern || ze Rapreswil, dar an er vns erlaubt vnd von sundern gnaden gûnnet hat, daz wi^er in dem krieg zwischen || im^e vnd den von Zurich vnd irn^e eydgnozzen stille sitzen múgen, vnd vns ouch denselben krig vs gesichert vnd getro^estet hat fu^er sich selber vnd all di^e sein, das der vorgenant vnser herr der hertzog diselben gnad vns vnder augen gegenwúrtichleich widerru^efft vnd abgenumen hat, dauon bechennen wi^er, wa derselben bri^ef fu^erbas funden vnd fu^ergezogen wirt, daz er dhainn chraft nicht mer haben vnd vns vnd den egenanten vnsern purgern vnnútzleich sein sol vnd daz er dem egenanten vnserm herrn dem hertzogen vnd allen den sein vnschedlich vnd vnvergrifflichen sein sol mit allen sachen. Wi^er sagen ouch den egenanten vnsern herrn den hertzogen der egenanten tro^estung vnd des bri^efs ledig, vnd ze v^erchund geben wi^er disen bri^ef versigelten mit vnserm vnd mit vnsers o^eheims graf Ymers von Strazperg¹ insigeln, daz ouch wi^er graf Ymer von Strazperg durch bete desselben vnsers o^eheims graf Hansen von Habsbu^erg daran gehangen haben. Geben ze Pruk in Êrgow^e an mentag nach sand Jacobs tag, nach Krists^e gebu^erd dreutzehen hundert iar, darnach in dem vi^er vnd fumftzigistem iar.

Source Fulltext: Chartularium Sangallense VII, Nr. 4365, S. 240-241.