Allen, die disen gegenwúrtigen brief ansehent alder ho^erent lesen, kv´nd ich Go^etfrid der Truhsa^ess von Diessenhouen¹ || ritter vnd vergih des offenlich an disem brief, daz ich willeclich vnd mit bedahtem můt nach miner gůten frv´nd vnd ander || erber lút râte dem erberen kneht Cv^onratten von Waibelingen² vnd sinen erben hab ze koffent geben reht vnd redelich || die schůpůss ze Waibelingen, dv´ wilent hern Cv^onrattes sa^eligen von Bussenang³ was vnd lehen ist von sant Gallen, vnd swaz zů der selben schůpusse ho^ert, mit allen nútzen vnd gewonhaiten vnd mit allen den rehten, als dv´ selb schůpůsse an mich komen vnd braht ist vnd als ich si gehebt vnd genossen hab her vntz an disen hv´ttigen tag, also hab och ich im die selben schůpůss ze koffent geben vmb ffv´nfzehen pfvnt pfenning gůter vnd gnemer Costentzer mv´ns vnd bin och der gar von im gewert vnd sint in minen redelichen nûtz komen vnd bekert, als ich vergih mit disem brief. Vnd hab im och die selben schůpůss mit des erwirdigen herren hant abt Hermans des gotzhus ze sant Gallen⁴ gefertigot vnd vffgeben mit allen den worten werken vnd geta^eten, so darzů hôrt vnd notdúrftig was nach gewonhait vnd nach reht, vnd hab mich darv´ber verzigen vnd verzih mich mit disem brief fúr mich vnd fúr alle min . . erben vnd . . nachkomen gen dem vorgenanten Cv^onratten von Waibelingen vnd gen allen sinen erben vnd . . nachkomen an der obgenanten schůpůsse aller aigenschaft, aller lehenschaft, aller vordervng, aller ansprach, alles schirmes, alles vszugs vnd alles mins rehten, so ich an der selben schůpůss hatte ald von dekainen dingen iemer gewinnen mo^eht von dekainer slaht geriht alder reht gaischelichs ald weltlichs. Ich vnd min . . erben so^elin och der selben schůpůsse sin vnd siner . . erben reht wern sin nach reht anê geuerde. Vnd ze warem vnd offeme vrkv´nd vnd sta^eter sicherhait aller dirre vorgeschriben dinge gib ich der vorgenant Go^etfrid der Truhsa^ess von Diessenhouen fúr mich vnd min . . erben vnd . . nachkomen dem selben Cv^onratten von Waibelingen vnd sinen erben vnd . . nachkomen darv´ber disen brief mit minem aigen insigel besigelten. Der brief ist ze Costentz geben, do man von Cristes gebúrt zalt drv´zehenhvndert jar, darnach in dem vier vnd ffv´nfzigosten jar, an sant Lûcyen abende.

Source Fulltext: Chartularium Sangallense VII, Nr. 4390, S. 253-254.