Wir Růpr. der elder von godes genaden pfalntzgrafe by Ryn¹ des heligen Romischen || rychs obirster drůhsezz hertzog zů Beyrn vnd vicari in Důtschen landen bekennen || vns offenbar mit disem brife, daz wir den erbern wysen lůden dem rad . . den || burgern gemeinlichen vnd der stad zů sand Gallen alle friheyt, reht vnd gůd gewonheit vnd alle ir brife, die sie hant von keysern vnd von kůngen vnd besůnderlich die brife vnd die genade, die sie hant von vnserm genedigen herren kůng Karln Romischen kůnge vnd kůng ze Behem, wollen stete halden vnd nit v^oberuaren on alle arglist, die weil wir vnsers egenanten herren kůng Karln des Romischen kůngs vicari seyn. Vnd were, daz sie ieman da von dringen wolde, da fůr sullen wir sie getrůlich schirmen on geverd, vz genomen vnsern obgenanten herren kůnge Karln. Dor v^ober zů vrchůnde geben wir in disen brife mit vnserm anhangenden insigel besigelten. Der geben ist zů Eszeling² am nehsten dornstag vor sand Andres dag des heligen zwelfboten, do man zalt von Cristes gepůrt drew^otzehenhůndert jare, dar nach in dem vier vnd fůmftzzigsten jare.

Source Fulltext: Chartularium Sangallense VII, Nr. 4388, S. 252.