Wir Karl von gots gnaden Romischer keiser zů allen zeiten merer dez reichs vnd kunig zů Beheim tůn kunt vmb die geltschult, so die purger von Raprechts||wile¹ gemeinlich von irr stat wegen gebin sullen den purgern von Zurich vnsirn vnd dez reich getruwen, oder dafur sich dieselben von Zurich fur dieselben || purgere von Raprechtswile anderswo angenomen haben, daz wir daz hintz vns genomen haben vnd doruber gesprochin habin vnd sprechen auch mit diesem || briefe, swaz die vorgenanten purger von Raprechtswile den von Zurich geltin sullen oder andern, da dieselben von Zurich hinder i^en steent vnd fur sie gelobit habent, daz dieselben von Raprechtswile nůr alleyn daz haubtgůt vnd die rechten geltschult richten vnd geben sullen von dem tage, als die ta^eding der sůne von den von Zurich besigelt werdent, dornach indwendig eynes mandis frist, vnd sullen dasselbe gelt antwerten vnd legen in die stat zů Basel in des rates gewalt daselbs, domy^ede zů bezalen die, den man daz gelt ist schuldig. Vnd sal auch in der zeit dhein schade darůf nicht geen, waz aber v^of dieselben geltschult von der zeit, als die sůne versigelt wirdet, schadens ginge oder vor gegangen were, der selbe schade sol allez dinges ab sein, vnd sullen auch dez die von Raprechtswile gentzlich ledig vnd loss sein, daz sei douon vnclagehaftig werden. Auch wullen wir den selben von Raprechtswile geholfen sein ane geuerde, daz i^en ir briefe, so sei vmb dieselben geltschult i^ern geltern geben habint, dornach vnd sie vns des houbguts gerichtet habent, zů hant ane geuerde wydergeben vnd ingeantwertit werdin. Mit vrkunt ditz briefs versigelt mit vnserm keiserlichen insigel, der geben ist zů Regenspurg nach Cristus geburt druzenhundert jar, dornach in dem fúnfvndfunftzigsten jare, an dez heiligen tzwo^elifboten sant Jacobs tage, vnserr reiche des Romischen in dem tzehenden, dez Beheimschinin dem nůnden vnd dez keisertůms in dem ersten jar.

Source Fulltext: Chartularium Sangallense VII, Nr. 4414, S. 268.