Allen den, die disen brief ansechent oder ho^erent lesen, kúnd ich Johans von Sechein¹ ritter vogt vnd wir der rat der stat ze Rappreswil² || vnd veriechen offenlich an disem brief, dz fúr v´ns kam an offen gericht Růdolf der Keller vnd fro^vw Anna sin elichú wirtin sú beidú || einhelleklich vnd namen da offenlichen vor v´ns einander vnbetwungenlich vnd mit friiem willigem můt ze rechten geteiligen || v´ber disú gu^eter, so hienach geschriben stand, vnd einander ze meindern. Des ersten an dem hof ze Togwil³, der jerlich giltet fúnf mút kernen, vnd an zwein můt kernen geltes vf dem fúnften teil des fares ze Rappreswil, dz ko^vft ward von Ru^edin Schilin, dz Heinrich Hecho hat, so denne an eim halben mút kernen geltes in dem teil des vares, dz Lútis Scheres^a) ist, so denne o^vch an fúnf stuk geltes in stritvach in fronvach vnd in stokfach, vnd o^vch also mit der geworsami vnd den gedingen, weders vnder inen beiden ab erstirbet vnd von todes wegen ab gat, so sol dz ander, dz denne lebet, dú vorgenanten gu^eter mit den zinsen, alz jeklichz sunderlich hie vorgeschriben stat vnd benemmet ist, im zúchen vnd rechter erb sin an alle widerred. Wer aber, dz der egenant Růdolf Keller vor der egenanten fro^vwen Annen Kellerrin sinr elichen wirtin abersturbi, so sol dú egenant fro^vw Anna oder ir erben, ob sú nút wer, des egenanten Růdolfz Kellers erben von den egenanten gu^etern vsrichten vnd geben drissig guldin gůter vnd genemer Florener an alle widerred vnd geuerd. Vnd wan dis alles beschechen ist an offem gericht, alz vrteil vnd recht gab von v´ns vnd andern erbern lúten, die ze gegen waren, die dar vmb erteiltont vnd gefragt wurden vf den eid, vnd mit aller sicherheit, so dar zů notdúrftig sin mocht, dar vmb so hant wir vnser stat insigel offenlich gehenket an disen brief, dar^b) war stet si vnd belib alles, dz hie vorgeschoben stat. Dis beschach^c) vnd ward dir brief geben des jares, do man zalt von gottes gebúrt drúzechen hundert jar, dar nach in dem fúnfzigostem vnd fúnften jar, an dem nechsten fritag vor aller heyligen tag.

Source Fulltext: Chartularium Sangallense VII, Nr. 4422, S. 276.