Wir die nâchgenemten V^olrich Steffan, V^olrich Branthoch, V^olrich Eberhart vnd V^olrich Johans genemt von Sax¹ gebrůder || tůn kunt vnd veriehent offenlich mit disem brieue fúr vns vnd fúr alle vnser erben allen, die in ansehent lesent oder ho^erent lesen, || daz wir alle gemainlich lieplich vnd gu^etlich gantzlich vnd gar v´ber ain komen vnd beriht sigent mit den . . lantlúten gemainlich ze || Appacelle² von der sto^ess vnd misshellung wegen, die wir mit in vntz vff disen húttigen tag, als dirre brief geben ist, gehept haben von v´nser lút vnd kneht wegen, die sú v´ns zerho^vwen vnd v´bel gehandlot hatten, daz wir noch v´nser erben, ob wir enwa^erint, sú noch dehain ir erben von der selben sto^ess vnd misshellung wegen niemerme angesprechen bekrenken bekúmberren noch schadgen súllent an iro lîp noch an iro gůt, mit worten noch mit werken noch mit dekainen andern sachen ân alle geua^erde. Wir veriehent o^vch offenlich mit disem brieue, daz wir alle gemainlich vnd vnser iekliche besunder gelobt habent mit gůten trúwen, daz wir alle v´nser frúnde, alle v´nser lúte, alle v´nser kneht vnd helffer vnd alle die, die von der selben sto^ess vnd misshellung wegen die vorgeschribenen lantlút ze Appacelle geuêhet hant, ze frúnd gewinnen súllent ân allen fúrzug vnd ân alle geua^erde, vnd daz wir o^vch die selben lantlút ze Appacelle gemainlich von der selben vorgeschribenen sto^ess vnd misshellung wegen vertro^est habent vnd vertro^estent mit disem brieue fúr alle v´nser frúnde, fúr alle v´nser lúte, fúr alle v´nser kneht vnd helffer, die vorgeschribenen sůn vnd rihtung sta^et ze habenn vnd ze lâssenn vnd da wider niemer ze komenn noch ze tu^enne, ân alle geua^erde, mit worten noch mit werken noch mit dehainen andern sachen. Vnd ze ainem waren vrkúnde vnd ze ainer sta^eten sicherhait aller der vorgeschribenen dinge so haben wir die vorgenemten V^olrich Steffan, V^olrich Branthoch, V^olrich Eberhart vnd V^olrich Johans von Sax gebrůder fúr v´ns vnd fúr alle v´nser erben v´nserú insigel gehenkt an disen brief. Der geben ist ze sant Gallen in der stat, an dem na^ehsten fritag vor sant Laurencis tag in dem jar, do man zalt von gottes gebúrt drúzehenhundert jâr, fúnfzig jâr vnd darnâch in dem sehsten jâr.

Source Fulltext: Chartularium Sangallense VII, Nr. 4446, S. 293-294.