Ich Herman von Landenberg ritter der elter genant von der Breiten Landenberg¹ vnd ich Ru^od. von Rosenberg² veriechen beid || offenlich vmb die zweij hundert guldin, so die erbern wisen der burgermeister die ra^et vnd die burger gemainlich der || statt Zúrich schuldig sint vnd o^vch ze gelten glopt hant fron Elsbethen mins des obgenanten von Landenberg elichú tochter || vnd mins des vorgenanten von Rosenberg elichú wirtin von der morgengab wegen, so ir her Ru^od. Byber selig ir errer wirt schuldig wz, sol man wissen, das o^vch wir beid fúr v´ns vnd v´nser erben getro^est haben vnd tro^esten mit disem brief, wenn der obgenanten fron Elsbethen oder ir erben die vorgeschriben zweij hundert guldin vsgericht werdent in dem zil, als si ir glopt sint vnd der brief hat, das o^vch si da mitt gar vnd gentzlich gewert sin sol alles rechten vordrung vnd ansprach, so si von morgengab von heinstúr von widerlegung von erecht oder von keiner hant sache wegen v´tzit ze sprechenn hatt gen dien obgenanten von Zúrich oder gen ieman andre von der selben sach wegen an all geuerd. Wer aber, dz die vorgenanten von Zúrich oder ieman ze ir wegen nv oder hienach bekúmberti oder angesprochen wurden von der obgenanten fron Elsbethen von iren erben oder von ieman andre ze ir wegen fúrbasser dann vmb die zweij hundert guldin, als ir brief hat, was die selben von Zúrich da von bresten oder schaden nemin, den haben wir die obgenanten Herman von Landenberg vnd Ru^od. von Rosenberg inen glopt fúr v´ns vnd v´nser erben ab ze legen gar vnd gentzlich an all geuerd. Her v´ber ze einem offenn vrkúnd, das dis vorgeschriben alles war sij vnd stet belib, so hat v´nser jetweder sin insigel offenlich geheinket an disen brief. Der geben ist an dem nechsten fritag nach sant Johs. tag des ewangelisten, do man zalt von gottes gebúrt drúzehen hundert vnd fúnfzig jar, dar nach in dem sibenden jar.

Source Fulltext: Chartularium Sangallense VII, Nr. 4458, S. 308-309.