Ich Wernher von Berge¹ vnd ich Cůnrat von Berge gebrůder sesshafft ze Bůchorn² wir baide vergehent offenlich mit vrkún||de dises brieues allen den, die in an sehent lesent oder ho^erent lesen, daz wir mit gemainem rate vnd alle vnser || erben vnd mit willen vnd mit gůtem gunst aller der, der wille vnd gůter gunst dar^a) zů notdúrfftig waz, hant || ze kôffenne gegeben aines rechten vnd redlichen ko^vffes v´nsern zehenden mit aller siner zů geho^erde von den gůten ze Ettenkilch³ vnd ze Wergiswisan⁴ vnd von andern gůten, da der selbe zehende vs gat, sú siint benemmet oder vnbenemmz, besůcht vnd vnbesůcht, der selbe zehende och lehen ist von dem erwirdigen herren vnd fúrsten . . dem apt von sant Gallen⁵, dem beschaidenne man Cůnrat dem Wolffegger burger ze Rauenspurg⁶ vnd sinen erben vmb sibentzzig phund phening Costentzer múns gůter vnd genger, der er v´ns ga^entzlich vnd gar gewert vnd berichtet hât vnd^b) vnsern vnd vnserre erben redlichen^c) nutz bewendet vnd komen sint, vnd habint im och dem obgenanten Cůnrat dem Wolffegger vnd sinen erben den selben vnsern zehenden ze ko^vffenne geben mit aller siner zů geho^erde ledigen vnd losen vnd vnanspra^echigen von aller ma^englichen vnd och mit allen nutzen vnd rechten, die ze dem selben zehenden ho^erent oder geho^eren múgent, vnd als in och v´nser lieber vatter sa^elig Jacob von Berge lange zît geho^ebt vnd genossen hât vnd in och an v´ns bracht hât, vnd habint im och dem obgenanten Cůnrat dem Wolffegger vnd sinen erben den selben zehenden gefertigot von dem erwirdigen herren . . dem apt von sant Gallen von siner hant, vnd ist och daz beschehen mit aller der gehúgde wort vnd werch, dú dar zů ho^eret oder geho^eren mag von gewonhait oder von gescribenem recht. Wir die obgenanten gebrůder baide Wernher vnd Cůnrat von Berge vnd v´nser erben entzihent v´ns och gen den obgenanten Cůnrat dem Wolffegger vnd gen sinen erben aller ansprach aller vorderung, die wir ze dem selben zehenden ie gewunnent oder noch gewinnen mo^echtint, vnd vergehent fúr v´ns selber vnd v´nser erben gegen aller ma^engliche(n), dez vorgenanten Cůnrats dez Wolffeggers recht wern ze sinde vmb den selben zehenden nach lehens recht. Vnd dez ze ainem waren vnd offenem vrkúnde vnd sta^eter sichherhait alles, so da vor gescriben stât, so henkent wir die obgenanten gebrůder baide Wernher vnd Cůnrat von Berge fúr v´ns vnd vnser erben v´nserú aigenú insigel an disen brief. Der geben ist ze Bůchorn in dem jare, do man zalte von Cristes gebúrt drúzehen hundert jare, in dem sibenden vnd funffzigosten jare, an dem nahosten fritag nach v´nserre frowun tag ze dem a^ernde ze in ga^endem aberellen.

Source Fulltext: Chartularium Sangallense VII, Nr. 4475, S. 328-329.