Allen den, die disen brief ansehen t lesend oder ho^erend lesen, kúnd ich Albreht von Lindenberg schulthaisse ze Wil¹ vnd vergih || offenlich mit disem brief, daz fúr mich kam ze Wil in der stat fúr offen geriht, da ich offenlich ze geriht sass, Cůnrat der || Karrer pfleger miner vrowen von Maggenow² vnd nam da Hainrich Lentzlin burger ze Wil ze fúrsprechen vnd offenet || da vor geriht, er hetti koft reht vnd redlich an miner vrowo stat von Maggenôw von Hainrich dem Kamrer burger ze Vrowenuelt³ an wîs gelegen in Tûrow⁴, die man nemmet dez Kamrers wîs, dú ainhalb stosset an dez Hůbers wis vnd anderhalb an daz holtz, fúr reht aigen mit allen rehten nútzen gewonhaiten vnd zůgeho^erden, so dar zů von alter geho^ert, vnd bat mich im ze eruarent, wie Hainrich der Kamrer da vorbenempt im an miner vrowen stat von Maggenow die vorbenempten wîs gelegen in Turow vertigen vnd vf geben so^elti, daz es kraft hetti nûn vnd hie nah, do vraget ich vorbenempter schulthaisse vnd rihter vrtail vmb, vnd wart ertailt mit gemainer vrtail, daz der vorbenempt Hainrich Kamrer die vorbenempten wîs vf geben so^elti an den stab ze den handen Cůnratz dez Karrers an miner vrowo stat von Maggenow, daz geschah vnd gab der vorbenempt Hainrich Kamrer die vorbenempten wîs vf an den stab ze den handen Cůnratz Karrers an miner vrowo stat von Maggenôw, do vraget ich vorbenempter rihter vrtail vmb, ob daz geschehen wa^ere, als reht wa^ere, do wart ertailt mit gemainer vrtail, daz es geschehen wa^ere, als geriht vnd vrtail braht hette. Vnd ist dis beschehen mit allen worten werken vnd geba^erden, so dar zů von reht geho^eret, vnd bat och der vorbenempt Cůnrat Karrer im ze eruarn an miner vrowo stat von Maggenow, ob man im dar vmb brief so^elti gen, do vorsehet ich der vrtail vmb vnd wart ertailt mit gemainer vrtailt, daz man im an miner vrowo stat dar vmb von reht brief geben so^elti. Vnd wan es geriht vnd vrtail braht, so han ich vorbenempter Alb reht von Lindenberg schulthaisse ze Wil ze merer sicherhait vorgescribener ding min insigel gehenket an disen brief. Ich Hainrich Kamrer da vorbenempt vergih och offenlich mit disem brief, daz ich ze koffend geben han reht vnd redlich Cůnrat dem Karrer pfleger miner vrowo von Maggenow an iro stat die vorbenenempten^a) wis in Turow fúr aigen mit allen rehten nútzen vnd zůgeho^erden vmb drisig phunt vnd vmb nún pfunt gůter pfenning Costenzer múnsse, dero pfenning ich von inen ganzlich gewert bin vnd in minen schinbaren nutz komen vnd bewent sint, vnd dar vmb sol ich ald min erben, ob ich enwa^er, der vorbenemten wîs wer sin nah reht, wa ald wie die vorbenempten min vrowa von Maggenow sin notúrftig sint an gaischlichem vnd an weltlichem geriht, vnd enzihe mich mit disem brief aller ansprach reht nútz vnd gewonhait, so ich ald min erben an die vorbenempten wis gehebt hand ald hie nah iemmer gewinnen mugen dehaines weges. Vnd ze merer sicherhait vorgescribener^b) ding henk ich vorbenempter Hainrich Kamrer min insigel an disen brief. Der geben wart ze Wil, do man zalt von gottes gebúrte drúzehenhundert jar, fúnfzig jar, dar nach in dem sibenden jar, an sant Mathyas abent.

Source Fulltext: Chartularium Sangallense VII, Nr. 4466, S. 318-319.