Allen, die disen brief sehent oder ho^erent lesen, kúnde ich Hainrich der Ru^edlinger vogt ze Fro^vwenuelt¹, daz ich ze Fro^vwenuelt offenlich ze gerichte sass, vnd kamen da fúr mich die fromen || lúte der edel herre her Fridrich von Bussenang² frije vnd dú edel fro^vwe vro Kúnigunt von Hewen³ des egenanten von Bussenang elich husfro^vwe mit ir erkornen vogte || dem edeln herren iuncher Hainrich von Clingen⁴ frijen, der ir v´ber dis sach mit ir wirtes willen vnd gunst vnd mit gerichte vnd mit vrtailde ze vogte geben wart, ainunt vnd || Cůnrat der Karrer von Maggeno^vwe⁵ ampteman vnd gewisser botte der erwirdigen gaistlichen fro^vwen in gotte der eptischen vnd gemainlich des conuentes des closters ze Maggeno^vwe⁶ sant Bernharts orden gelegen in Costentzer bistůme vnd an ir statt andrunt. Vnd offente da mit fúrsprechen der vorgenante her Fridrich von Bussenang, daz er recht vnd redlich vnd ane alle geuerde der eptischenne vnd gemainlich dem conuent des vorgenanten closters ze Maggeno^vwe fúr ledig aigen ze ko^vffenne geben hat daz gůt, daz man nemmet Horatz gůt⁷, wingarten vnd acker vnd was darzů ho^eret, stosset ainhalb an Schliphenbergers⁷ gůt vnd anderhalb an des Hofmans gůt, vmb sibenzig phunt phenning Costenzer múntz, der er gar vnd gantzlich von inen gewert ist vnd in sinen elichen nutz verkert hat, des er vor gerichte veriach, vff daz selbe gůt er vor mals dú egenanten sin elich husfro^vwen vmb etzwauil gůtes in phandes wise gesetzet vnd gewiset hatte. Vnd batt im der vorgenante her Fridrich von Bussenang vnd o^vch dú obgenante sin euch husfro^vwe mit ir vogte vnd mit fúrsprechen ze erfarnde, wie si dien closterfro^vwen des vorgenanten gotshus daz vorgesaite gůt vertigen vnd vfgeben so^eltin, daz es nu vnd hernach kraft hetti. Da fragte ich vrtailde vmbe, do wart ertaillet mit gesamnoter vrtailde, sider daz vorgenant gůt aigen were, daz er es denne da vor gerichte mit gelerten worten an des egenanten Cůnrats Karrers hand zů der vorgenanten closterfro^vwen wegen gemainlichent da wol verzihen vnd vfgeben mo^echti vnd daz sich o^vch dú vorgenante vro Kúngunt sin elich husfro^vwe mit dem egenanten ir vogte o^vch ir phantschatzes vnd alles des rechten, so si darzů hatte, an sin hand mit gelerten worten ze der selben closterfro^vwen wegen gemainlich wol verzihen mo^ehte, vnd als balde daz besche^ahe, daz es denne billich nu vnd hernach kraft hetti. Vnd also verzech sich da der obgenante her Fridrich von Bussenang vor gerichte recht vnd redlich an des egnanten Cůnrat Karrers hand zů der eptischennen vnd ze der closterfro^vwen wegen gemainlich ze Maggeno^vwe mit gelerten worten, als gerichte vnd vrtailde gab, des vorgeschriben gůtes vnd alles des rechten, so er darzů hatte oder iemer gewinnen mo^ehti mit gaistlich oder we^altlichen gerichten oder ane gerichte ald mit thainen sachen, da mit er si dar an bekrenken oder beswe^arren mo^ehte, vnd lopte o^vch der obgenante her Fridrich von Bussenang fúr sich vnd sin erben, des selben gůtes wer ze sinne fúr ledig aigen nah rehte, wo die closterfro^vwen des vorgeschriben closters des notdúrftig sint an gaistlichen vnd an we^altlichen gerichten. Es stůnt och dú vorgenanten vro Kúngunt sin elichú husfro^vwe dar fúr gerichte willeklichen vnd gerne an den stab vnd verzech sich mit des obgenanten ir erkornen vogtes hand recht vnd redlich frilich vnd vnbetwungenlich an des egenanten Cůnrat Karrers hand zů der eptischennen vnd des conuentes wegen gemainlich des closters ze Maggeno^vwe mit gelerten worten, als gerichte vnd vrtail gab, des vorgeschriben gůtes vnd alles des phantschatzes, so si dar vffe hatte, vnd alles des rechten, so si darzů hatte oder gehaben mo^echte oder noch iemer gewinnen mo^ehti mit gaistlichen oder mit we^altlichen gerichten oder ane gerichte oder mit thainen sachen, die ieman erdenken kan, da mit si oder ir erben die closterfro^vwen des vorgenanten closters ze Maggno^vwe oder ir nachkomen an dem selben gůte in thain wise iemer bekrenken oder kúmberren mo^ehti, vnd geschahen allú dú vorgeschribenen ding mit aller ehafti vnd gewarsami wort vnd werch, so nah recht zů solichen sachen ho^eret vnd man tůn sol, als verre daz mit gesamnoter vrtail ertaillet wart, daz daz verzihen von dem egenanten von Bussenang vnd von siner elicher husfro^vwen gen dien closterfro^vwen ze Maggno^vwe besche^ahen were, als recht ist, vnd daz es o^vch billich nu vnd hernach kraft haben mag. Vnd des alles ze ainem waren vrkúnde han ich der vorgenante vogt, als mir vor gerichte ertaillet wart, disen brief geben besigelten mit minem insigel. Wir die egenemten her Fridrich von Bussenang vnd vro Kúngunt sin elich husfro^vwe vergehen o^vch ainer ganzen warhait aller der ding, so vor von v´ns an disem brief verschriben stant, vnd des ze warem vrkúnde haben wir o^vch v´nsrú ingesigel gehenkt an disen brief. Ich der vorgenant iuncher Hainr. von der Alten Clingen vergihe o^vch an disem brief, daz dú vorgenante vro Kúngunt allú dú vorgeschribenen ding mit miner gunst vnd gůtem willen recht vnd redlich frilich vnd vnbetwungenlich getan hat, vnd des ze ainem waren vrkúnde vnd meren sicherhait aller dirre sache han ich in vogtes wise min ingesigel gehenket an disen brief. Der geben wart ze Fro^vwenuelt an dem ne^ahsten samstag nach sant Sebastians tag, do man zalt von gotes gebúrte drúzehenhundert iar, fúnfzig iar, dar nah in dem sibenden iare.

Source Fulltext: Chartularium Sangallense VII, Nr. 4463, S. 312-314.