Allen den, die disen brief ansehent lesent oder ho^erent lesen, kúnd ich Eberhart von Lo^vmais¹ vnd vergich offenlich mit disem brief fúr mich vnd fúr alle || min erben, das ich mit gůter vorbetrahtung vnd beschaidenhait dem beschaiden kneht Hainrich dem Keller burger ze Wil² vnd sinen erben, ob er enwa^er, || reht vnd redlich verlihen han ze ainem sta^etten erbzinslehen dú hofstat gelegen ze Wil in der nidrun vorstat in der Stadelgassun³, die man nemmet Eberhartz || hofstat von Lo^vmais, mit allen rehten, so darzů geho^erent, das ich durch reht lihen sol, vnd lih im reht vnd redlich mit disem gegenwrtigen brief aller ia^erlich vmb ain pfunt pfeffers gena^emes Costenzer gewihtes, also das er ald sin erben mir ald minen erben ia^erklich ie ze der alten vasnaht das selb pfunt pfeffers ân alle minrung geben vnd antwrten sont an allen fúrzug. Ich hân och gelobt, das ich noch min erben den selben zins niemer gemeren sont mit dekainen dingen, wenn och ich ald min erben die selben hofstat verkoffenn wellen, so súllen wir sú dem selben Hainrich dem Keller ze dem ersten vail bieten vnd sont im si och zehen schilling pfenning bas geben denn ieman andren, vnd wenn och er ald sin erben den stadel, der vf der selben hofstat stat, verkoffen wellent, so sont sú in mir och ze dem ersten vail bieten vnd sont mir in och zehen schilling bas geben dann ieman andren, vnd sol das baidenthalb geschehen ân geua^erd. Wa^er^a) aber, das ich ald min erben den selben stadel von dem vorgenemten Hainrich ald von sinen erben nút koffen wo^eltin, so hant sú darnach vollen gewalt, den selben stadel ze verkoffenn, wem sú wend, also vnd in dem rehten, das mir minú reht dauon nút geschwehret werden noch der zins, so dauon gat, das selb sol och ich vnd min erben tůn mit der hofstat, och das inen irú reht dauon nút geschwechret werdent. Vnd des ze ainer warhait henk ich Eberhart von Lo^vmais da uorgenemt min insigel fúr mich vnd min erben an disen brief. Der geben ist ze Wil in der stat in dem jar, do man zalt von gottes gebúrt drúzehenhundert jar, fúnfzig iar vnd darnach in dem achtoden jar, an dem na^ehsten ma^entag vor sant Niclaus tag.

Source Fulltext: Chartularium Sangallense VII, Nr. 4571, S. 417.