Allen den, die disen brief ansehent oder ho^erent lesen, kúnde vnd vergich ich Otto von Rambach burger || ze Rapreswile¹ offenlich, das ich den erwirdigen geistlichen herren dem . . apte . . conuente vnd gotzhuse ze Kapella² || Grawes ordens in Kostenzer bistom han geben den zehenden ze Lúthartingen³ vnd ze Edlibach⁴ mit aller der || rechtunge vnd ehafti, die ich an dem selben zehenden hatte, den selben zehenden mit aller rechtunge ich o^vch von minen gnedigen herren von Hapsburg⁵ ze lehen hatte, von den ich o^vch den vorgenanden zehenden mit aller rechtunge den vorgenanden geistlichen herren mit miner gnedigen herren von Habsburg willen gunst vnd besigelten briefen geuertiget han, als die selben miner gnedigen herren briefe wol bewisent, den vorgenanden zehenden Arnold vnd Peter die Tôsser von Barra⁶ gebrůdere von mir ze lehen hatten, vnd o^vch die vorgenanden Thôsser den selben zehenden den vorgenanden geistlichen herren dem apte conuente vnd gotzhus von Kapel redlich vnd recht mit miner gunst gůtem willen vnd hant ze ko^vffenne hant geben⁷ vmb fúnf vnd drissig phunt phenninge genger vnd geber múntze, der si o^vch nach ir vergicht gar vnd gentzlich von in gewert sint vnd in irn nutz bekert hant. Ich han o^vch fúr mich min erben vnd nachkomen, die ich dar zů binde mit disem briefe, den vorgenanden geistlichen herren dem apte conuente vnd gotzhus gelobt bi gůten trúwen, ob si von minen gnedigen herren von O^esterrich oder ir vo^egten ald amptlúten wegen vmb die zehenden in keinen weg wurden bekúmbert oder geschadget, das ich ald min erben inen den súlen ablegen vnd súlen si vnschadhaft machen. Ich enzich mich o^vch fúr mich vnd alle min erben vnd nachkomen alles rechten, so ich hatte an den vorgenanden zehenden, vnd loben o^vch die vorgenanden zehenden niemer an zesprechenne mit worten noch mit werken mit gerichte noch ân gerichte noch mit enkeinen artikeln noch sachen, da von die vorgenanden herren vnd gotzhus beswert oder geschadget mo^echten werden, an alle geuerde, vnd loben o^vch der vorgenanden zehenden mit aller rechtunge wer ze sinne der egenanden herren vnd gotzhuses, wa vnd wenne sin die vorgenanden herren bedurfen vnd an mich ald an min erben sůchent. Wir die vorgenanden Arnolt vnd Peter Tôsser von Barra gebrůdere veriehen offenlich, dz alles dz an disem briefe von v´ns geschriben ist, dz das alles war ist, vnd loben o^vch fúr v´ns v´nser erben vnd nachkomen, stête ze habenne noch niemer da wider ze tůnne mit worten noch mit werken mit gerichte geistliche(m) noch weltliche(m) noch ân gerichte noch mit enkeinen artikeln sachen noch fúnden, si sin ietze funden oder werden noch funden. Vnd wan wir nit eigenner insigeln haben, so han wir erbetten den wolbescheiden man v´nsern gnedigen junkherren junkhern Otten von Rambach, dz er sin ingesigel an disen brief hat gehenket offenlich ze einer gewerren steten offennen sicherheit aller der vorgeschriben dingen fúr sich selber sin erben nachkomen vnd fúr v´ns, da vnder o^vch wir v´ns v´nser erben vnd nachkomen binden. Vnd hier v´ber ze einem offennen v´rkúnde aller der vorgeschriben ding henk ich der vorgenant Otto von Rambach min hangend ingesigel an disen gegenwúrtigen brief fúr mich vnd fúr die vorgenanden Arnolt vnd Peter Thôsser, wan mich die dar vmb gebetten hant, vnd fúr v´nser aller drijer erben vnd nachkomen. Dis beschach vnd wart dirre brief geben ze Kapel in dem jare, do man von gottes gebúrte zalte druzehenhundert vnd acht vnd fúnfzig jar, mornendes nach der heiligen kindelin tag. Da zegegen waren der erwirdig geistlich herre apt Johans von Kapel⁸, brůder V^olr. grosser kelner des selben gotzhus, her Johans lútpriester von Barra, her Heinrich von Rambach lútpriester von Horgen⁹, brůder Johs. sutermeister, brůder Heinrich pfistermeister, Walther Barrer von Kapel vnd ander erber lúte.

Source Fulltext: Chartularium Sangallense VII, Nr. 4572, S. 418-419.