Ich Cv^onr. Phefferhart Stattamman ze Cost(entz)¹ tůn kunt allen, die disen brief an an||sehent oder ho^erent lesen, daz Johans Bernow mins herren von sant Gallen² ge||wisser bot fúr mich kam fúr geriht vnd klegt ze Hainrichen Ratgeben || dem va^erwer vnd sprach, er horti von dem libe an daz gotzhus ze sant Gallen, vnd bat gerihtz ze im vmb dienst. Des was der obgenant Hainrich Ratgeb vnlogenba^er vnd dienot och da vor geriht, als im ertailt wart, dem obgenanten Johansen Bernow an mins herren stat von sant Gallen mit zwain ha^entschůhen nach der stat ze Cost(entz) gewonhait vnd reht. Vnd des ze vrkúnd gib ich der vorgenant amman min insigel an disen brief. Der ist ze Cost(entz) geben, do man von Cristes gebúrt zalte drúzehenhundert jar, dar nach in dem a^eht vnd fúnffzigosten jar, an dem na^ehsten samstag nach aller hailgen tag.

Source Fulltext: Chartularium Sangallense VII, Nr. 4568, S. 414.