Allen den, die disen brief an sehent oder ho^erent lesen, kúnd ich Cůnrat von Kesswille¹ schulthais ze Liehtenstaig² vnd vergih || des offenlich an disem brief, daz fúr mich kament an offen geriht, do ich der obgenant schulthais ze Liehtenstaig an offener friier || lantstrass offenlich ze geriht sass, Walther Flissknab vnd fro Anna sin elichú wirtenn vnd V^olrich sin eliche sun ze ainem tail || vnd Hainrich von Ebersol³ kilchmaiier vnd phleger oder schafner der kilchen oder der cappell ze Liehtenstaig⁴ ze der selben kilchen wegen ze dem andern tail, vnd offenot da der obgenant Walther Flissknab vnd fro Anna sin elichú wirtenn vnd V^olrich iro sun, daz sú ainen hof habent haissett Hebenholtz⁵, der bi Lomass⁶ gelegen ist, der iro aigen ist, vnd offenot och fúrbas, daz der zehend des selben hofes vnd ain malter kornes jarlichs geltes sin vnd siner erbo vor vs sin so^elt vnd och were vnd daz dú kilch oder ir phleger dar nah den vierdentail des zins haben so^elt vnd och den vierdentail des hofs mit allen rehten, was des were, den zehenden vnd daz malter habern geltes, vnd nament dú obgenanten Walther Flissknab vnd fro Anna sin elichú wirtenn vnd V^olrich iro sun den obgenanten Hainrichen von Ebersol der obgeschribenen kilchen phleger oder schaffner ze dem lieht der obgeschribenn kilchenn ze rehtem gemainder zů des liehtes wegen vnd an siner stat, als geriht vnd vrtail gab vnd als mit besamnotter vrtail ertailt wart, das es kraft hette vnd och reht were. Es nam och der obgenant Hainrich von Ebersol der obgesaitten kilchen vnd des liehtes phleger dú obgenanten Walthern, fro Annen vnd V^olrichen iro sun ze rehten gemaindern ze des obgeschriben liehtes der vorgesaitten kilchen wegen in aller der wis, als och sú in ze gemainder genomen hatte^a), zů so vil geltes, als vor geschriben stat vnd als geriht vnd vrtail gab, daz es kraft hette vnd och reht were. Vnd des ze warem vnd offem v´rkund alles des, so hie vor an disem brief geschriben stat, vnd won es mir ertailt wart, so henk ich der obgenant schulthais min aigen insigel von des gerihtes wegen an disen brief, der ze Liehtenstaig geben ist, do man zalt von gottes gebúrt drúzehenhundert jar vnd dar nah in dem ahtvndfúnftzgosten, an sant Othmars abent des abtz.

Source Fulltext: Chartularium Sangallense VII, Nr. 4570, S. 416.