Wir Herman von gottes gnâden abt dez gotzhûs ze sant Gallen¹ tu^en kunt vnd veriehen offenlich mit disem brieue || allen, die in ansehent lesent oder ho^erent lesen, daz fúr v´ns kâment ze sant Gallen, do wir ze geriht sâssent, v´nser lieber || getrúwer Walther von Englaberg² vnd Adelhait sin elichi wirtinne, vnd offenotent offenlich vor v´ns mit fúrsprechen vnd || sprâchent also, sú wo^eltint baidú gemainlich mit gůter vorbetrahtung vnd beschaidenhait durch iro vnd iro vordern selen nutz vnd hailes willen den hof ze Albreswîlle³ gelegen vnderthalb Geriswîlle⁴, der von v´ns vnd v´nserm gotzhûs iro lehen wa^er, mit allen rehten vnd mit aller zů geho^erde ân allain den zehenden von dem selben hof willeklich vnd frilich in v´nser hant v^f geben an den bûwe sant Gallen vnd sant Ôthmars dez múnsters v´nsers vorgenemten gotzhus ze sant Gallen, vnd bâten v´ns eruarn an ainer vrtail, wie sú daz tůn so^eltint vnd mo^ehtint, daz ez nv^ vnd o^vch hienâch kraft hett, daz tâten wir, vnd ward ertailt mit gemainer vrtail, daz der vorgenemt Walther von Englaberg den vorgeschribenen hof ze Albreswîlle mit siner hânt in v´nser hant v^f geben so^elt, vnd daz die vorgenemt Adelhait sin elichi wirtinne ainen vogt nemen so^elt an dem ring, wen si wo^elt, mit dez selben ir êlichen wirtes willen, vnd si der ze drin mâlen vsser dez gerihtes ring fu^eren so^elt vnd si frâgen, ob si willeklich vnd gern ta^et vnd tůn wo^elt, vnd daz si dann den selben hof mit ir vnd mit dez selben ir vogtes handen an v´nser hant v^f geben so^eltint, do nam si mit dez selben ir elichen wirtes willen vnd gunst Johansen Sa^errin burger ze sant Gallen ze vogt, der fůrt si ze drin mâlen vsser dez gerihtes ring vnd frâgot si, als ertailt was, ob si ez willeklich vnd gern ta^et vnd tůn wo^elt, der sait ze ieklichem mâl bi sinem aide, daz si spra^ech, daz si ez vnbezwungenlich ta^et vnd willeklich tůn wo^elt, vnd gabent do die vorgenemten Walther von Englaberg mit siner hant vnd Adelhait sin elichi wirtinne mit ir vnd mit dez êgenemten Johans Sa^erris ir vogtes handen den vorgschribenen hof ze Albreswille mit hûs, mit hof, mit akkern, mit wisen, mit wasen, mit zwi, mit allen rehten, nútzzen vnd gewonhaiten vnd mit aller zů geho^erde, ân allain den zehenden von dem selben hof, willeklich vnd gern gantzlich vnd gar v^f an v´nser hant mit so^elicher beschaidenhait vnd in dem rehten, daz der selb hof ze Albreswîlle mit allen rehten vnd mit aller zů geho^erde, ân allain der zehend, hinnenhin iemer mê geho^eren sol an sant Gallen vnd sant Ôthmars bûwe dez múnsters v´nsers vorbenemten gotzhus ze sant Gallen, vnd verzigent sich o^vch da die vorgenemten Walther von Englaberg vnd Adelhait sin elichi wirtinne mit dem êgenemten irem vogt willeklich vnd gern gantzlich vnd gar vnd verzihent sich mit disem brieue fúr sich vnd alle ir erben aller aigenschaft, aller lehenschaft, alles rehten, aller vordrung vnd aller ansprâch gaistlichs vnd weltlichs gerihtes, so sú vnd ir erben, ob sú enwa^erint, an dem vorgeschribenen hof ze Albreswîlle biz her ie gehattent, vnd ist diz alles beschehen vnd vollefu^ert reht vnd redlich mit allen den worten werken vnd geta^eten, so nâch gewonhait vnd nâch reht darzů gehortent vnd nôtdurftig wârent vnd als reht sitte vnd gewonlich was. Vnd ze wârem offenem vrkúnde vnd sta^eter sicherhait aller diser vorgeschribenen dinge haben wir abt Herman da vorgenemt v´nser insigel gehenkt an disen brief. Darnâch veriehen wir die vorgenemten Walther von Englaberg, Adelhait sin elichi wirtinne vnd Johans Sa^erri ir vogt in der vorgeschribenen sache offenlich mit disem brieue ainer gantzen wârhait aller der dinge, so der êrwirdig v´nser gna^ediger herre von gottes gnâden abt Herman da vorgenemt von v´ns da vor an disem brief veriehen hât, vnd ze mêrer sicherhait der selben dinge so haben wir o^vch v´nserú insigel gehenkt an disen brief. Der geben ist ze sant Gallen, an dem na^ehsten fritag vor sant Mychêls tag in dem jâr, do man zalt von Cristus gebúrt drúzehenhundert jâr, fúnfzig jâr vnd darnâch in dem núnden jâre.

Source Fulltext: Chartularium Sangallense VII, Nr. 4639, S. 466-468.