Wir graf Cůnrat von Fúrstenberg¹ vnd frow Adelhait von Griessenberg² gra^efin von Ffúrstenberg tůnt kunt allen den, die disen brief an sehent oder ho^erent lesen, vnd vergehent des || offenlich fúr v´ns vnd all v´nser erben vnd nahkomen, daz wir baidú mit gůter vorbetrahtung vnd mit wolbedahtem sin vnd mút lieplich vnd gu^etlich v´ber ain komen vnde || beriht sint vmb alle die sto^ess vnd vmb alle die ansprach, so wir bedú hattond zů dem vnd an den edeln herren graf Ffriderichen von Tockenburg³ vmb hundert mark vnd vmb || fúnftzig mark gůtes vnd lo^etiges silbers, so mir der obgenanten fron Adelhaitten der edel herr graf Dyethelm sailig von Tockenburg⁴ wilunt min elicher huswirt des obgenanten graf Ffriderich von Tockenburg brůder schuldig was vnd gelobt hatt ze geben ze rehter morgengab, vnd won wir dú obgenanten graf Cůnrat von Fúrstenberg vnd fro Adelhait gra^efin von Fúrstenberg mit gůter vorbetrahtung vnd mit wolbedahtem sin vnd můt vmb die obgeschriben ansprach vnd vmb alle die sto^ess vnd vmb alle die ansprachan von der anderhalphundert mark silbers wegen vnd von der morgengab wegen vo^elleklich gar vnd gantzlich beriht sient, da von so vergehent wir offenlich fúr v´ns vnd alle v´nser erben gen dem obgenanten graf Ffriderichen von Tockenburg vnd sinen erben, daz wir v´ns entzigen habint vnd och entzihent mit disem brief aller vordrung vnd ansprach vnd alles des rehten, so wir ie gehattond oder ie gewunnent oder ie eriegt habint mit gaischlichen oder mit weltlichen gerihten oder in kain wis, vnd verzihent vnd entzihent v´ns an disem vnd mit disem brief aller hilf vnd alles schirms vnd vfzugs^a) gaischliches vnd weltliches gerihtes, damit wir oder v´nser erben oder nahkomen den obgesaitten graf Friderichen von Tockenburg oder sin erben iemer me fúrbas bekúmbern oder bekrenken mo^ehtind in kain wis vmb die obgeschriben morgengab vnd ansprach, vnd sient och bedú von der obgesaitten ansprach vnd morgengab vnd von allen den ansprachan, so von der vorgebenempten^b) morgengab komen mo^ehtind oder si beru^eren mohtind, gangen beriht vnd gestanden mit aller der gehúgde^c) ehafti gewarsami worten werken raitten vnd getaitten, so dar zů hort alder geho^eren solt von reht oder gewonhait des landes. Vnd dar vmb ze merer sicherhait vnd ze warem vnd offem vrkúnd alles des, so an disem brief geschriben stat, so henk ich dú obgenant^d) fro Adelhait gra^efin von Fúrstenberg min aigen insigel fúr mich vnd alle min erben offenlich an disen brief, vnd won ich obgenanter graf Cůnrat von Fúrstenberg der obgenanten fron Adelhaitten von Fúrstenberg gra^efin miner elichen husfrowen rehter vogt bin, vnd och dú obgeschriben rihtung mit minem rat gůtem willen vnd wissent beschehen vnd follfu^ert ist, vnd won och ich alles daz gelobt han stait ze haben, daz von mir an disem brief geschriben stat, so henk ich obgenanter graf Cůnrat von Fúrstenberg min aigen insigel in vogtes wis vnd och fúr mich offenlich an disen brief. Der ze Swartzenbach⁵ vff v´nsrer burg geben ist, do man zalt von Cristes gebúrt drúzehenhundert jar vnd dar nah in dem núnvndfunftzgosten jar, an dem nehsten zinstag nah sant Vitis vnd Modesten tag.

Source Fulltext: Chartularium Sangallense VII, Nr. 4607, S. 447-448.