Allen den, die disen brief sehent oder ho^erent lesen, kúnd ich Otto von Rambach vnd vergich offenlich vnd mit || mir vnd mit miner hant fro Elsbetha min elichú husfro^vwa, Heinrichs seligen Bilgrins tochter, dem man || sprach Heinrich mines ênis, vnd Vrsula vnd Margareta v´nser beider tochtren, das wir gemeinlich vnd vnuer||scheidenlich gelobt han vnd loben o^vch mit disem brief, den erwirdigen geistlichen herren dem apte conuente vnd gotzhus von Kapel Grawes ordens in Kostenzer bistům ze vertgenne den zehenden ze Lúthartingen vnd ze Edlibach, den ich den vorgenanden herren von Kapel geben han, von v´nsren gnedigen herren grâfen Johansen, graf Růdolf vnd graf Go^etfrid von Habspurg, von dien ich die selben zehenden ze lehen hatte, vnd v´nserre vorgenanden herren von Habspurg besigelten brief mit irer aller hangenden ingesigeln dar v´ber ze schaffenne, als sin die vorgenanden herren von Kapel notdurftig sint. Vnd wa wir dz nit entêten, kêmen denne die vorgenanden herren vnd gotzhus ze deheinem kumber ald schaden nach varende ald mit gerichte ald âne gerichte ald in keinen weg, den súlen wir inen gentzlich ablegen vnd súlen si vnschadhaft machen ân alle geuerde. Vnd des ze einem vrkúnde vnd vester sicherheit so gib ich den vorgenanden geistlichen herren vnd gotzhus disen brief mit minem hangenden ingesigel offenlich besigelt fúr mich vnd die vorgenanden min elichen wirtinnen vnd v´nser beider tochtren, die sich o^vch dar vnder bindent, vnd fúr alle v´nser erben. Wir die vorgenanden Elsbetha, Vrsula vnd Margretha veriechen, was hie vor von v´ns geschriben ist, dz dz war ist, vnd loben es o^vch stête ze habenne vnd niemer da wider ze tu^enne mit enkeinen sachen. Dis beschach vnd wart dirre brief geben ze Raprechtswile in dem jare, do man von gottes gebúrte zalte drúzehenhundert vnd nún vnd fúnfzig jar an dem ersten tag meijen des manodes.

Source Fulltext: Chartularium Sangallense VII, Nr. 4593, S. 433.