Ich graue Růdolf von Montfort¹ herr ze Veltkilch² kúnd vnd vergih offenlich an disem gegenw´rtigen brief allen den, die in sehent || alder ho^erent lesen, das der vest ritter her Johans von Ramenswag³ zů mir kam gen Veltkilch in die stat vnd bat mich || verliehen dú lehen, die sin vordern vnd er von minen vordern vnd von mir ze lehen hattend vnd hand, das ist dú || vogtay ze V´rsin⁴, dú von mir lehen ist, mit allen den rehten, die dar zů ho^erent in wassern in veld in holtz an wasen an zwigen an allen ehaftinan vnd mit rehten vnd gewonhaiten, die zů der selben vogtai ho^erent, das ich dú selben lehen lúhe im vnd allen sinen liberben, es sigin tohtran alder knaben. Das han ich willeklichen getan, vnd durh sinr liebi willen han ich im vnd allen sinen liberben dú vorbenemten lehen reht vnd redlich nah lehens reht gelúhen ze rehtem lehen. Vnd so vil me, wa^eri das der vorgenant her Johans von Ramenswag a^vn liberben sturbi, so hat er hút zetag die vorbenempten vogtai ze V´rsin mit allen den rehten vnd gewonhaiten besůhtem vnd vnbesůhtem, als ers von mir ze lehen hatt, gefu^egt vnd gemaht fro Gůten sinr swo^ester hern Burkartz von Elrbach⁵ elicher husfrowen vnd allen iren kinden o^vch tohtran vnd knaben, vnd ist das beschehen mit minr hand mit worten vnd mit werken, als sitt vnd gewonlichen ist, vnd nah lehens reht, vnd ob es ze schulden komet, so hat der vorgenant her Johans von Ramenswag siner vorbenemten swo^ester fro Gůten hern Burkartz von Elrbachs ritters elicher husfrowen vnd allen iren liberben, es sigin tohtran ald knaben, v´ber dú obgeschriben lehen ze getrúwen tragern geben hern Marquarten von Emptz ritter vnd Eglin von Emptz gebrůder⁶. Den selben tragern han ich disú vorbeschaidenú lehen gelihen, ob her Johans von Ramenswa^vg a^vn liberben stirbt, das si dann getrúw trager sin sond siner obgenanten swo^ester fro Gůten von Elrbach vnd iro kinden tohtran vnd knaben. Dirre ding ze ainer offen vrkúnd han ich graf Růdolf von Montfort herr ze Veltkilch min insigel gehenkt an disen brief. Der geben ward ze Veltkilch, do man zalt von Cristes gebúrt drúzehenhundert iar vnd sehtzig iar, an dem donrstag nah sant Agnesen tag.

Source Fulltext: Chartularium Sangallense VII, Nr. 4662, S. 486-487.