Ich Johannes Goltstein burger Zúrich vergich offenlich an disem brief, als die erbern geistlichen fro^vwen dú . . || eptischin vnd der conuent gemeinlich des gotzhus ze Wurmspach¹ min tochter Mechthilt, dú wilent V^olrichs Hirtz || elichú wirtin was burgers Zúrich, in ir conuent ze klosterfro^vwen enpfangen hant, die selben min tochter || Ru^od. Omo von Erlibach² von einer ê wegen ansprechig hat, von dem o^vch si ze Kostentz an offennem gericht von im komen ist, also das si in ein bewerten orden varen sol vnd mag, als die brief³ wol bewisent, die der selben miner tochter dar vmb ze Kostentz geben vnd versigelt sint, vnd sol si der egenant Omo dar an sumen noch iren mit ekeinen sachen an alle geuerd, sol man wissen, were das es ze schulden kerne, das dú vorgenant eptyschin vnd der conuent ze Wurmspach von der obgenanten miner tochter wegen keinest von dem egenanten Omen oder von ieman andere mit geistlichen gerichten vf getriben wurden, da sol ich si ze Rom ze Megentz⁴ ze Kostentz vnd mit namen an allen geistlichen gerichten, wo vnd wenn si des notdúrftig sint, gentzlich verstan vnd von allem schaden wisen, den si von keinen geistlichen gerichten von der obgenanten miner tochter wegen genemen mo^echtin, ane alle geuerd. Her vmb ze einer meren sicherheit so han ich inen ze rechten tro^estern geben die fromen vesten min lieben herren hern Eberhart Múlner ritter schultheissen Zúrich vnd Ru^od. von Lunkof⁵ vogt Zúrich, die o^vch mit mir vnuerscheidenlich die vorgenanten eptyschinen vnd den conuent gemeinlich ze Wurmspach mit gůten trúwen glopt hant von der egenanten miner tochter wegen an allen geistlichen gerichten ze verstanne vnd von allem schaden ze wisen, als vorgeschriben stat, ane alle geuerd. Ich der vorgenant Goltstein han o^vch fúr mich vnd min erben mit gůten trúwen glopt, die vorgenanten hern Eberhart Múlner vnd Ru^od. von Lunkof vnd ir beider erben, ob si enwerin, gentzlich von allem schaden ze wisen in dirr sach. Her v´ber ze einem offenn vrkúnd aller vorgeschriben ding so han ich min insigel offenlich gehenkt an disen brief. Wir die vorgenanten her Eberhart Múlner ritter vnd Ru^od. von Lunkof haben o^vch ze einer vergicht alles des, so vor von v´ns geschriben stat, v´nsrú insigel offenlich gehenkt an disen brief. Der geben ist Zúrich an sant Margarethen tag, do man zalt von gottes gebúrt drúzehenhundert jar, dar nach in dem sechzigosten jar.

Source Fulltext: Chartularium Sangallense VII, Nr. 4693, S. 510-511.