Ich V^olrich von der Hohen Klingen¹ frije lantrichter in Thurgo^vwe tůn kunt, daz fúr mich kamen ze der Lo^vben² an || dem lantag an dem ne^ahsten fritag vor sant Johans tag ze súngihten die erbern lúte Růdolf von Liehtensteig³ || schriber mins herren von sant Gallen einhalb vnd Marcus der Kamrer von Wila⁴ anderhalb. Vnd offente da mit || fúrsprechen der vorgenante Růdolf der schriber, daz im von dem gerichte verkúndet were, daz der egenante Marcus der Kamrer die nutzlichen gewer versprochen hette, die er von dem gerichte genomen hatte v´ber den zehenden ze Matzingen⁵, vnd daz im o^vch gebotten were, daz ze versprechenne vff disen húttigen lantag vff rechte. Vnd offente der vorgenante Růdolf der schriber mit fúrsprechen vnd sprach, daz der selb zehende ze Matzingen sin recht lehen were von hern Johans dem Giele von Liebenberg⁶, vnd hette darzů sinen gene^adigen herren, der im den selben zehenden ze rechtem lehen gelihen hette, won er im ledig worden was von Johs. dem Kupherscmit seligen von Fro^vwenuelt⁷, an dem selben zehenden sumdi in Marcus der Kamrer von Wila. Vnd batt, ob es recht were, daz ich im gebutte, daz er in an dem selben zehenden vngesumet liessi. Des antwrt Marcus der Kamrer mit fúrsprechen vnd sprach, daz er den selben zehenden geko^vffet hette von dem, des der selb zehende gewesen were, vnd von sinem vogte. Vnd were o^vch geritten zů hern Johans dem Giele von Liebenberg, won der der elteste were, vnd hetti den gebe^atten, daz er im den selben zehenden ze lehen lihe. Der verseite im daz vnd wo^elte im nit lihen, vnd do fůr er zů V^olrich dem Giele von Glatburg⁸, der darnach der elteste was, vnd batt den, daz er im den vorgenanten zehenden lihe. Der erhorte o^vch sin be^atte vnd lehe im den selben zehenden, vnd hette o^vch darzů sinen gene^adigen herren, vnd hetti o^vch den selben zehenden in siner nutzlichen wer gehebt vnd hette in noch hútte dis tags inne, vnd getrúweti, sider er den selben zehenden geko^vffet hette vnd o^vch sinen gene^adigen herren darzů hetti, der im des gihtig were, daz er o^vch billich bi dem lehen bliben so^elte. Des antwrt aber der obgenante Růdolf der schriber vnd sprach, sit daz V^olrich vnd Heinrich die Giele von Glatburg vor gerichte gesprochen hetten, daz der selb zehende von inen ze einem teil vnd von hern Johans vnd von V^olrichen dien Gielen von Liebenberg ze dem andern teil von beiden teiln gemeinlich lehen were, vnd sit er den selben zehenden ze lehen enphangen hetti von hern Johs. dem Giele, der der elteste were, der im o^vch des selben lehens vnder o^vgen gihtig were, so getrúweti er dem rechten, sider die egenanten Giele von Glatburg sprechen, daz sú me gemeindere zů dem selben zehenden hetten, daz er denne billich gerawet sitzen so^elte, vntz daz die egenanten V^olrich vnd Heinrich die Giele von Glatburg ze einem teil vnd her Johs. vnd V^olrich die Giele von Liebenberg ze dem andern teil ein ander gerechtuertigent vnd sich befunde mit dem rechten, weder teil den selben zehenden lihen so^elti, vnd were, daz sich befunde, daz V^olrich vnd Heinrich die Giele von Glatburg den selben zehenden als wol lihen so^elten als her Johs. vnd V^olrich die Giele von Liebenberg, so wo^elte er aber denne liden vnd tůn, was recht were. Do fragte ich der vorgenante richter vrteil vmb, do wart erteillet mit gesamnoter vrteil, sit daz V^olrich vnd Heinrich die Giele von Glatburg vor gerichte vnlo^vgenber weren vnd selb gesprochen hetten, daz sú me gemeindere zů dem selben zehenden vnd zů dem lehen hettin, daz denne der egenante Růdolf der schriber bi dem zehenden ze Matzingen billich gerawet vnd vngemu^eget bliben sol, vnz daz die vorgenanten V^olrich vnd Heinrich die Giele von Glatburg vnd her Johans vnd V^olrich die Giele von Liebenberg ein ander gerechtuertigent vnd daz sich befindet mit dem rechten, wederre teil den selben zehenden durch recht lihen so^ele, ald ob beide teil den selben zehenden gemeinlich lihen súln. Vnd des ze warem vrkúnde han ich des lantgerichts insigel in Thurgo^vwe gehenket an disen brief. Der geben wart an dem vorgeschriben lantag nach Kristus gebúrte drúzehenhundert vnd sechtzig iaren.

Source Fulltext: Chartularium Sangallense VII, Nr. 4686, S. 504-505.