Allen den, die disen brief sehent lesent oder ho^erent lesen, kúnden wir Johans vnd V^olrich genemt die Stainibrunner gebrůder burger ze sant Gallen vnd veriehen || des offenlich an disem brief fúr v´ns vnd fúr all v´nser erben, das wir den hof ze Stainibrunnen¹, der v´nsers vatter Hainrich des Stainibrunners selgen was vnd || stôsset an Johans Wildrichs hof vnd an des spitals² hof vnd an Ramungs hof, mit gůter vorbetrahtung dem erbern vnd wolbeschaiden man Bartholome dem Blâr||rer³ o^vch burger ze sant Gallen vnd sinen erben redlich vnd reht ze ko^vffen habin geben mit wasen mit zwî mit aker mit wisan mit holtz mit veld mit waidan mit stegen mit wegen mit wasser flússen vnd mit allen rehten vnd gewonhaiten vnd mit aller zů geho^erd, so zů dem selben hof ald darin geho^erent gantzlich ald in dehainen tail, es si benemt ald vnbenemt, gesůcht ald vngesůcht, vmb zwai vnd núntzig phunt phenning gůter vnd ge^aber Costentzer múnse, der wir gantzlich vnd gar von im gewert sient vnd enphangen habint vnd an v´nsern redlichen nutz bekert habint, den selben vorgenemten hof haben wir dem egenemten Bartholome Blarrer in dem rehten ze ko^vffen geben, das er reht lehen ist von ainem abt vnd dem gotzhus ze sant Gallen, vnd haben o^vch dem selben Bartholome Blârrer den selben vorgenemten hof mit allen rehten, als vorgeschriben stât, geuertgot vnd in sin hant braht mit des êrwirdigen v´nsers gena^edigen herren hant abt Hermans abt des gotzhus ze sant Gallen⁴, als reht sitt vnd gewonlich was. Darzů so haben wir vnd o^vch Cůnrat der Olmishuser o^vch burger ze sant Gallen dem vorgenemten Bartholome Blarrer gelopt mit v´nsern trúwen an aines rehten aides statt, das wir vnd v´nser erben des selben Bartholome Blârrers vnd siner erben reht weren súllent sin nach reht vmb den vorgenemten hof vnd vmb den vorgeschriben ko^vf gen Annun v´nser der vorgenemten Johansen vnd V^olrichs êlichen swo^ester vnd darzů gen menlichem an gaistlichem vnd an weltlichem geriht vnd an allen stetten, da es dem vorgenemten Bartholome vnd sinen erben notdúrftig ist, ân allen des selben Bartholomes vnd siner erben schaden. Wir die vorgenemten Johans vnd V^olrich die Stainibrunner vnd Cůnrat der Olmishûser habent o^vch dem egenemten Bartholome vnd sinen erben gelopt mit v´nsren trúwen an aines rehten aides statt, das wir vnuerzogenlich inrent dem na^ehsten manot, nach dem so die egenemt Anna ze ir tagen kunt, fu^egen vnd schaffan sont, das si dem obgenemten Bartholome vnd sinen erben, ob er enwa^er, den vorgenemten hof vertgo^e vnd v^f geb mit allen rehten, so si daran hât, als sin der selb Bartholome vnd sin erben notdúrftig sint vnd als och wir getân habint, als vorgeschriben stât, vnd nâch der selben vertgung des selben Bartolome vnd siner erben gen der selben Annun vnd gen menlichem reht wern sient nâch reht, wa sú sin notdúrftig sint an gaistlichem ald an weltlichem geriht. Gescha^ech o^vch, das vnder v´ns der vorgenemten Johansen, V^olrichen vnd Cůnraten dehainer von todes wegen ab gieng, e^a) dis alles wollefu^ert^b) wurdi, so sont die andren zwen, die dennoht vnder v´ns lebont, bi der trúw, als vorgeschriben stât, dem obgenemten Bartholome Blârrer vnd sinen erben inrent dem na^ehsten manot, nach dem vnd die selben zwen vnder v´ns darumb ermant werdent von dem vorgenemten Bartholome ald sinen erben, ob er enwa^er, ze hûs ze hof ald vnder o^vgen mit ir botten ald mit ir brieuen oder von in selben, ainen andren an des stat geben, der vnder v´ns abgangen ist, der als gůt vnd als gewiss sie, als der was, der abgangen ist, vnd der sich o^vch des bind vnd also lobe, als der getân hât, der abgangen ist, als vorgeschriben stât. Wa^er aber, das wir die vorgenemten Johans vnd V^olrich vnd Cůnrat an dehainem der vorgeschriben stuk sûmig wa^erind vnd niht laistent noch ta^etint, als wir gelopt hânt, als vorgeschriben ist, so hât der egenemt Bartholome vnd sin helfer vnd sin erben vnd ir helfer, wer die sint, vollen gewalt, v´ns vnd v´nser erben, ob wir enwa^erint, vmb ieclich stuk, daran wir sumig gewesen sint vnd das wir nit gelaist habint, ze no^etenn vnd anzegriffen vnd v´nser gůt darumb ze heftenn mit gaistlichem ald mit weltlichem geriht ald ân reht, wie ald wa sú das getůn mugent vff dem land ald in den stetten, vntz das wir das volfu^erin vnd gelaistin, das wir laisten vnd tůn sont, als vorgeschriben stât, vnd vntz das der egenemt Bartholome vnd sin erben vnd ir helfer von dem schaden, in den sú von der sûmung ald von des angriffens heftens ald no^etens wegen koment, wie sich das fu^eget, gantzlich erledgot werdent. V´ber das alles so haben wir die egenemten Johans vnd V^olrich v´ns gantzlich vnd gar enzigen vnd enzihent v´ns mit disem brief fúr v´ns vnd fúr all v´nser erben aller ansprâch alles rehten vnd aller vordrung, so wir hatten ald iemer gewinnen mo^ehtin zů dem vorgeschriben hof ald zů dehainen rehten, so darzů geho^erent von aigenschaft ald von lehenschaft ald von dehainer ander sach wegen, vnd ist dis alles reht vnd redlich beschehen mit allen den worten vnd werken, so darzů gehorten vnd notdúrftig wârent von reht vnd von gewonhait. Vnd ze ainer gantzer sicherhait aller der vorgeschriben ding vnd geding so haben wir die vorgenemten Johans vnd V^olrich die Stainibrunner vnd o^vch Cůnrat der Olmishuser v´nsrú insigel gehenkt an disen brief fúr v´ns vnd fúr all v´nser erben. Dirr brief wart geben ze sant Gallen in dem maien an dem ma^entag nach des hailigen crútzes tag, als es funden wart, in dem jâr, do man zalt von gottes gebúrt druzehenhundert jâr vnd darnach in dem sehtzigosten jâr.

Source Fulltext: Chartularium Sangallense VII, Nr. 4679, S. 497-499.