Wir Geori von gottes gnâden abt vnd der conuent gemainlich des gotzhus ze sant Gallen¹ sant Benedicten ordens in Costenzer bisto^vm kúnden vnd veriehen offenlich mit disem || brief fúr v´ns vnd fúr alle v´nser nachkomen allen, die disen brief ansehent lesent oder ho^erent lesen, das wir ainhelleklich vnd mit gůter vorbetrahtung nâh wiser gelerter || pfaffen vnd layen rat durch nutz vnd fúrdrung v´nsers vorgeschriben gotzhus die widmen ze Kilchdorf², die v´nsers vorgenemten gotzhus reht aigen ist vnd ainhalb stosset an || den brunnen vnd andrenthalb an die gebraiti, die hinder der kilchen ze Kilchdorf lit, mit dem kilchensatz der selben kilchen. der o^vch v´nsers vorgenemten gotzhus reht aigen ist, gesúndert vnd geschaiden haben mit allen rehten, so darzů geho^erent, von v´nsers vorgenemten gotzhus hof ze Kilchdorf, also daz der selb kilchensatz in die vorgenemten widim geho^eret vnd ho^eren sol eweklich vnd dú selb widim zů dem selben kilchensatz. Darnach veriehen wir och, daz wir in v´nserm cappittel ze den ziten vnd ze den stunden, do wir es tůn solten vnd mochten, volleklich betrahtot vnd gemainlich vnder v´ns selben berett vnd geoffenot haben die grossen nutzlich vnd getruwen dienst, so der edel Oswalt von Wartenberg, den man och nemmet von Wildenstain³, v´ns vnd v´nserm gotzhus als nutzlich vnd als frúntlich getan hat vnd noch tůn mag, vnd sunderlich an dem gůt ze Husen⁴, das v´nserm vorgenemten gotzhus roblich entwert was vnd daz sunderlich mit siner helf wider zů des selben gotzhus handen vnd gewaltsami komen vnd gezogen ist. Die selben dienst haben wir ainhelklich angesehen vnd betrahtot vnd haben mit gůter vorbetrahtung gemainlich vnd ainhelklich dem egenemten Oswalten vnd sinen erben, ob er enwa^er, vmb die vorgeschriben dienst, die er v´ns vnd v´nserm gotzhus getan hat vnd noch wol tůn mag, die vorgenemten widmen mit dem kilchensatz der vorgenemten kilchen ze Kilchdorf fúr reht ledig aigen von frijen genâden vnd mit frijem willen geben vnd gebent mit disem brief ze rehtem aigen mit allen zehenden nútzen vnd rehten, so darzů geho^erent vnd ho^eren sont, mit holtz mit veld mit steg mit wegen mit wunn mit waid mit akkern mit matten mit wisen mit zwi mit wasser mit wasser rúnsen vnd mit allen nútzen, so vntz her darzů geho^eret hant oder noch geho^eren mo^echten, si sien funden ald si werden noch funden, vnd setzzen den selben Oswalt vnd sin erben in liplich vnd in nutzlich gewêr der selben widmen vnd des kilchensatz vnd aller der reht vnd gu^eter, so darzů geho^erent, als vor geschriben stat, růweklich ze niessenn ze besitzenn ze besetzzenn vnd ze entsetzzenn vnd ze haben als ir aigen gůt ân v´nser vnd v´nser nachkomen widerred. Hierúber so haben wir v´ns willeklich vnd wolbedahtklich ainha^elklich mit gemainem rat enzigen vnd enzihen v´ns mit disem brief fúr v´ns vnd fúr alle v´nser nachkomen v´nsers ordens aller rehtung vordrung vnd ansprach, so wir ald v´nser vordern ie gewnnen oder iemer gewinnen mo^echtin zů der vorgeschriben widim vnd zů dem vorgeschriben kilchensatz ald zů dehainen gu^etern vnd rechtungen, so darzů geho^erent noch geho^eren solten, es sie offen funden ald verschinen, vnd lo^vbent och, da wider niemer ze tu^enne mit gaistlichem noch mit weltlichem geriht bi v´nsern gůten trúwen ân geua^erd. Darzů haben wir v´ns o^vch entwêrt vnd entwêrren v´ns mit disem brief aller gewêr, so wir oder v´nser vordern ie gewnnen ald v´nser nachkomen iemer gewinnen mo^echten zů der vorgeschriben widim, dem vorgeschriben kilchensatz vnd zů den gu^etern vnd rechtungen, so darzů geho^erent, als vor geschriben stat. Vnd ist dis alles beschehen vnd volfu^ert mit allen den worten vnd werken, so darzů notdurftig waren von reht vnd von gewonhait. Vnd das dis alles war sta^et vnd sicher belîb nu vnd hernach, so hân wir der vorgenemt abt Geori vnd der conuent gemainlich des gotzhus ze sant Gallen v´nser vnd v´nsers conuentes insigel gehenkt an disen brief fúr vns vnd fúr alle v´nser nachkomen. Der geben ist ze sant Gallen an sant Lucien tag, do man zalt von gottes gebúrt drúzehenhundert jar vnd darnach in dem sechzigosten jare.

Source Fulltext: Chartularium Sangallense VII, Nr. 4716, S. 525-526.