Allen den, die disen brief ansehent oder ho^erent lesen, kúnden ich Johans von Langenhart vogt¹ vnd wir . . der rât der || statt ze Rapreswile², das fúr vns kame Růdolf Walpersperg Heinrichs Walperspergs selgen wilunt burgers ze || Rapreswile elicher sun vnd ofnot da vor v´ns, das er luterlich durch got vnd durch siner vnd aller siner vordern sele || heils willen ledklich vnd vrpflichtz habe gegeben dem spitel des heilgen geistes ze Rapreswile³ anderhalbe juchart reben mit aller zůgeho^erde gelegen ze Menidorf⁴ an Moshalten⁵, einunt nebent Hermans Brunners reben vnd andrunt nebent Isellis reben, mit so^elicher bescheidenheit vnd gedinge, das der spitel die reben in gůtem vnd gewonlichem buwe vnd in eren haben sol âne geuerde, vnd das der blůme, der da von kumt, a^ellú iare einhalbe vss in des spitels kelre geleit sol werden vnd in der dúrftigen, die denne in dem spitel sint, nutze vnd notdurft komen sol gantzlich vnd gar, daz die da von ierliche gespiset oder getrenket oder bekleit werden, alz si ie denne aller notdúrftigost sint vnd alz verre denne ie der blůme gelangen mage âne alle geuerde, vnd also das der vorgenant spitel die reben weder versetzen noch verko^vffen sol noch ir deheins wegs a^enig werden sol noch niemen von des spitels wegen ane alle geuerde. Wa^er aber, das der vorgeschribenn stuke deheins da vernútten, v´beruaren oder v´bersehen wurde eine gantze iar vnd sich das enphunde mit der warheit, so sont die vorgeseiten reben mit aller zůgeho^erde denne gantzlich ledige vnd veruallen sin den armen lúten an der Flůhe⁶ ze Rapreswile, vnd sol der vorgenant spitel dannenhin keine recht vordrung noch ansprache zů den reben niemer me gehaben noch niemen von sinen wegen in keine wise. Vnd das dis alles wâr sta^ete vnd vnwandelber belibe, so haben wir die obgenanten . . der vogte vnd . . der râte ze Rapreswile durch des egenanten Růdolfs Walperspergs vnd durch der nachbenemten pfleger vnd meisters bette willen vnser stat insigel offenlich gehenket an disen brief. Wir Johans Hegdorn vnd Cůnr. Lútolt pfleger vnd ich Johans Strútzzo meister des eben(empten) spitels ze Rapreswile veriehen offenlich ze des selben spitels handen aller der dinge, so da vor an disem brief geschriben stant. Vnd dez ze warem vrkúnde haben wir des selben spitels insigel fúr v´ns vnd fúr v´nser nachkomen o^vch gehenket an disen brief. Der geben ist ze Rapreswile, des iars, do man zalte von gottes gebúrt drútzehenhundert iar vnd dar nach in dem einen vnd sechtzgosten iar, an sant Lucien abent der heilgen ma^egde.

Source Fulltext: Chartularium Sangallense VII, Nr. 4774, S. 579-580.