Allen den, die disen brief ansehent lesent oder ho^erent lesen, tůn ich Cůnrat Copp burger ze Wil¹ kunt vnd vergich offen||lich mit disem brief fúr mich vnd fúr alle min erben, das ich von miner redlichen not wegen Růdolfen den Bůcher, || der von dem gotzhus ze sant Gallen min lehen was, reht vnd redlich verkoft vnd ze koffenn geben han dem erwir||digen minem gena^edigen herren abt Georien von gottes genaden abt des gotzhus ze sant Gallen² vnd dem vorgeschriben gotzhus ze sant Gallen vmb fúnf pfunt pfenning gůter Costenzer múns, der ich gantzlich von im gewert bin, vnd hân den vorgenemten Růdolfen den Bůcher mit lib vnd mit gůt minem vorgenemten herren vnd dem gotzhus ze sant Gallen vfgeben vnd geuertgot, als reht sitte vnd gewonlich was, vnd hân mich och darúber enzigen vnd enzih mich mit disem brief gen minem vorgenemten herren abt Georien vnd gen dem gotzhus ze sant Gallen aller aigenschaft aller lehenschaft aller manschaft aller^b) alles rehten gaistlichs vnd welthchs gerihtes aller vordrung vnd ansprach, so ich von reht oder von gewonhait zů dem vorgenemten Růdolfen dem Bůcher zů sinem lib ald zů sinem gůt hatte oder von kainerlay sach wegen iemer gewinnen mo^echt. Ich hân och gelobt fúr mich vnd fúr alle min erben, des vorgenemten Růdolfs des Bůchers wer ze sinn nach reht gen ma^englichem vf gaistlichem vnd vf weltlichem geriht, wa vnd wenn ald wie dik sin min vorgenemter herre abt Geori vnd das vorgeschriben gotzhus ze sant Gallen ald ir amptlút ald der vorgenemt Růdolf der Bůcher bedurfent ald notdurftig sint ald darumb vfgetriben vnd angesprochen werdent, das ich vnd min erben sú darumb ân allen iren schaden vnd an allen fúrzug vnd widerred verstan vnd versprechen sont vnd von der ansprach entrihen vnd ledig machen ân geua^erd. Vnd dez ze ainer warhait henk ich Cůnrat Copp da vorgenemt min insigel fúr mich vnd fúr alle min erben an disen brief. Der geben ist ze Wil in dem jar, do man zalt von gottes gebúrt drúzehenhundert jar vnd darnach in dem ain vnd sechzigosten jare, an dem na^ehsten zinstag vor sant Thomans tag.

Source Fulltext: Chartularium Sangallense VII, Nr. 4775, S. 580-581.