Ich^a) graue Růdolf von Montfort² herr ze Veltkilch³ kúnd vnd vergih offenlich an disem brief allen den, die in seh||ent alder ho^erent lesen, das ich mit gůter vorbetrahtung han ze ko^vfent geben reht redlich vnd aigenlich dem || erwirdigen herren abt Johansen von sant Johanne⁴ im Turtal vnd den herren vnd cappitel gemainlichen || des selben gotzhuses ze sant Johann in dem Turtal vnd iren nahkomen disú nahbenemten gůt vnd gůter, das stuk des wingarten ze Fro^ewis⁵, dem man spriht Viole, mit dem inuang, als dise nahgeschriben markan begriffen hand, des ersten stosset der wingart vnd inuang ze der ainen siten an Haintzen des Snetzers mins burgers wingarten, ze der andren siten stosset der wingart vnd inuang an der selben herren von sant Johanne wingarten, vnd stosset dannan vfhin an den Borhuser, vnden vf o^vch an des Borhusers gůt vnd obnan nider an Fro^ewiner wisan, vnd dar zů den torggel, der dar vnder gelegen ist, mit aller zůgeho^erd alles torggels geschierrs, das dar zů geho^eret. Dar zů han ich inen ze ko^vfent geben den egedahten des Borhusers wingarten gelegen in Berhten Veld vnd das holtz vnd studach grund vnd grat gelegen ob dem selben des Borhusers wingarten vnd dannan anhin ob dem Violen vntz an die gassen, vnd o^vch die dritten zainnen alder den drittentail des obsess vnd der nusse des gebo^vmes in Berhten Velde, das nút vf disen ietzgedahten gu^etern stat. Dis obgenanten wingarten vnd torggel gůt vnd gůter mit grund mit grat mit holtz mit veld mit wune mit waid mit steg mit weg mit wasser flússen mit aller zůgeho^erd vnd mit allen rehten vnd ehaftinan han ich dem obgenanten abt Johansen vnd den herren vnd dem cappitel des gotzhuses ze sant Johanne im Turtal aigenlich ze ko^vfent geben fur v´nbekúmbert^b) gůt vnd gu^eter ledig vnd los von ma^englichem vmb zwai vnd fúnftzig phunt phenning alles gůter vnd genger Costentzer múns, der ich aller gar nah minem willen von inen gewert bin vnd in min nutz komen sind. Des alles ich vnd min erben iro vnd iro nahkomen gůt wern sin so^ellint nah reht, wa es inen iemer notdúrftig wirt, an gaistlichem oder an weltlichem geriht. Vnd das dis alles war vnd sta^et belibi, des ze vrkúnd han ich obgenanter graf Růdolf von Montfort dem obgenanten abt Johansen vnd den herren vnd cappitel des gotzhuses ze sant Johanne im Turtal vnd iren nahkomen disen brief geben mit minem insigel behenktem fúr mich vnd min erben. Der geben ward ze Veltkilch, do man zalt von Cristes gebúrt drúzehenhundert iar vnd zwai vnd sehtzig jar, an sant Gregorien abent in der vasten.

Source Fulltext: Chartularium Sangallense VIII, Nr. 4793, S. 14.