Allen den, die disen brief ansehent lesent oder ho^erent lesen, kúnd ich Be^artelli Niessli vogt ze Swarzenbach¹ vnd vergich offenlich mit disem brief, daz fúr mich kamen ze Rikkenbach² vnder der || linden, do ich von mines gena^edigen herren graue Cůnratz wegen von Fúrstenberg³ offenlich ze geriht saz, Johans von Brunberg⁴ Hainrichs sa^eligen von Brunberg elichen sun vnd Anna sin elichi wirtinne || Cůnratz des Růpreswillers elichi tochter ainhalb vnd Hainrich der Suter von Lamprehtswille⁵, den man nemmet Adelberg, andrenthalb, vnd namen da die vorgenemten Hans von Brunberg vnd Anna sin || elichi wirtinn ze fúrsprechen Johansen Borhuser burger ze Wil⁶, der offenot von ir wegen vnd an iro stat vnd sprach, daz sú von ir redlichen not wegen ellú dú reht vnd rehtung, so sú hatten zů dem an dem hof^a) ze dem Nidren Brunberg⁷ ald darinn ald darus, reht vnd redlich verkoft hettin vnd hettin dú selben reht vnd rehtung ze koffenn geben dem vorgenemten Hainrich dem Suter vnd sinen erben vmb zehen pfunt Pfenning gůter Costenzer múns vnd wa^erin och der selben Pfenning gantzlich von im gewert vnd wo^elten im och dú selben reht vnd rehtung vf geben vnd vertgen, als reht wa^er, vnd baten mich erfarn an ainer vrtail, wie sú daz tůn so^eltin, daz es kraft hetti nu vnd hienach, do fragt ich vorgenemter rihter vrtail vmb, vnd ward ertailt mit gemainer vrtail, daz der vorgenemt Johans von Brunberg daz mit siner hand an des gerihtes stab tůn so^elti vnd daz die vorgenemt Anna sin elichi wirtinn na^em ainen vogt an dem ring, wen si wo^elt, mit des vorgenemten ir elichen mannes willen vnd daz si der selb ir vogt fúrti ze drin malen vsser des gerihtes ring vnd si ze ieglichem mal fragti, ob si es vnbetwngenlich ta^et vnd willeklich vnd gern tůn wo^elt, vnd dann daz mit ir vnd mit^b) des selben ir vogtes handen an des gerihtes stab tůn so^elti vnd daz es also wol kraft hetti nah dem rehten. Do nam si ze vogt Hainrichen den Verren von Búrglon⁸ wilent amman ze Swarzenbach mit des vorgenemten ir elichen mannes willen, dem ich och die vogtye nâh des landes gewonhait verleh vmb die sach, der fůrt si ze drin malen vsser des gerihtes ring vnd fragt si ze ieglichem mal, als im vormals ertailt was, ob si es vnbetwngenlich ta^et vnd willeklich vnd gern tůn wo^elt, der sait och ze ieglichem mal bi sinem ayd, daz si es vnbetwngenlich ta^et vnd willeklich vnd gern tůn wo^elt, vnd gab da der vorgenemt Johans von Brunberg mit siner hand vnd och die vorgenemt Anna sin elichi wirtinn mit ir vnd mit des vorgenemten ir vogtes handen ellú dú reht vnd rehtung, so sú hatten vsser dem zů dem an dem vorgeschriben hof ze dem Nidren Brunberg ald daran, letklich vf an des gerihtes stab mit gelerten worten, als inen vormals ertailt ward, vnd enzeh sich och da der vorgenemt Johans von Brunberg mit siner hand vnd och die vorgenemt Anna mit ir vnd mit des selben ir vogtes handen an des gerihtes stab vor offenem geriht vnd enzihent sich^c) mit disem brief fúr sich fúr alle ir erben vnd nâhkomen gen dem vorgenemten Hainrichen dem Suter gen allen sinen erben vnd nâchkomen aller aigenschaft aller lehenschaft aller manschaft aller gemaind aller gewer alles vszugs alles rehten gaistlichs^d) vnd weltlichs gerihtes aller vordrung vnd ansprach, so sú an dem in dem zů dem ald vsser dem vorgeschriben hof ze dem Nidren Brunberg ald daran gantzlich oder an dehainem tail des houes hatten oder von kainerlay sach wegen iemer gehân gewinnen oder erwerben mo^ehtin von reht oder von gewonhait. Die vorgenemten Hans von Brunberg vnd Anna sin elichi wirtinn hant o^vch gelobt fúr sich vnd fúr alle ir erben, der vorgeschriben reht vnd rehtung vnd des kofs wer ze sinn nâh reht gen ma^englichem vf gaistlichem vnd vf weltlichem geriht, wa vnd wenn ald wie dik sin der vorgenemt Hainrich der Suter ald sin erben bedurfent vnd notdurftig sint, ân geua^erd. Vnd dez ze ainer warhait henk ich Bertelli Niessli vogt da vorgenemt min insigel von des gerihtes wegen an disen brief. Darnach veriehen wir die vorgenemten Hans von Brunberg, Anna sin elichi wirtinn, Hainrich der Verre vogt vnd Johans Borhuser fúrsprech in diser vorgeschriben sach ain gantz warhait aller der ding, so hieuor von v´ns an disem brief geschriben stat, vnd ze merer sicherhait der selben ding henken wir die vorgenemten Hainrich der Verr vogt vnd Johans Borhuser fúrsprech in diser vorgeschriben sach v´nsri insigel an disen brief, vnd won wir die vorgenemten Johans von Brunberg vnd Anna sin elichi wirtinn aigener insigel nút enhaben, so haben wir v´ns verbunden vnd binden v´ns mit disem brief vnder des vorgenemten Hainrichs Verren insigel, war ze lassenn vnd sta^et ze haltenn alles, daz von v´ns an disem brief geschriben stat. Der geben ist ze Swarzenbach in dem jar, do man zalt von gottes gebúrt drúzehenhundert jar, sechzig iare vnd darnach in dem andern jare, an dem na^ehsten zinstag nach vnser frowen tag ze der liechtmisse.

Source Fulltext: Chartularium Sangallense VIII, Nr. 4786, S. 5-6.