Allen den, die disen brief ansehent lesent oder ho^erent lesen, tůn wir die nachgenemten Otto, Cůnrat, Burkart vnd Walther von Ainwille¹ || gebrůder kunt vnd veriehent offenlich mit disem brief fúr^a) vns vnd fúr alle v´nser erben, daz wir von v´nser redlichen not || wegen reht vnd redlich verkoft haben Margarethen Cůnrat Pfinlis elichen tochter, die v´nser aigen was von dem lib, vnd haben mit || lib vnd mit gůt vnd mit allen rehten ze koffen geben dem erwirdigen herren abt Johansen von gottes verhengnúst abt des gotzhus ze sant Johann² gelegen in Turtal sant Benedicten Ordens in Costenzer bisto^vm, sinen nachkomen vnd dem selben gotzhus vmb vier pfunt Pfenning gůter Costenzer múns, der wir gantzlich von im gewert sigen, vnd haben och die selben Margarethen mit lib vnd mit gůt dem vorgenemten herren abt Johansen vnd dem selben gotzhus ze sant Johann vfgeben vnd geuertgot, als reht sitt vnd gewonlich was, vnd habent v´ns och darúber enzigen vnd enzihent v´ns mit disem brief fúr v´ns vnd fúr alle v´nser erben gen dem vorgenemten herren abt Johansen, gen sinen nâchkomen vnd gen dem selben gotzhus ze sant Johann aller aigenschaft aller lehenschaft aller manschaft aller kuntschaft aller gewer aller zúgnúst lút vnd brief alles rehten gaistlichs vnd weltlichs gerihtes aller vordrung vnd ansprach, so wir an der vorgenemten Margarethen zů ir lib ald zů ir gůt hatten oder von kainerlay sach wegen iemer gehan gewinnen oder erwerben mo^echten, wir habent och gelobt fúr v´ns vnd fúr alle v´nser erben, der vorgenemten Margarethen vnd des kofs wer ze sinn fúr aigen nâch reht gen ma^englichem vf gaistlichem vnd vf weltlichem geriht, wa ald wenn sin der vorgenemt herre abt Johans sin nächkomen ald die vorgenemt Margareth bedurfent vnd notdurftig sint, ân geua^erd. Vnd ze offenem waren vrkúnd vnd sta^eten sicherhait aller diser vorgeschriben ding henken wir die vorgenemten Otto, Cůnrat, Burkart vnd Walther von Ainwille gebrůder v´nsri insigel fúr v´ns vnd fúr alle v´nser erben an disen brief. Der geben ist ze Me^aldegg³ in dem jar, do man zalt von gottes gebúrt drúzehenhundert jar, sechzig iare vnd darnach in dem andern jare, an dem na^ehsten ma^entag vor dem balms tag.

Source Fulltext: Chartularium Sangallense VIII, Nr. 4802, S. 23-24.