Allen den, die disen brief sehent lesent ald ho^erent lesen, kúnd ich Johans von Haidelberg¹ || ritter vnd vergih offenlich an disem brief, daz Cůnrat vnd Anne ab der Veser Egge² || wilunt Hainrichs ab der Egge³ elichú kind, dú baidú min lehen warent von dem gotzhus ze || sant Gallen, sich selber ir lib vnd gůt von mir reht vnd redelich gekoffet hant an daz vorgenant gotzhus aigenlich vmb drú pfund vnd vmb fúnf schilling pfenning gůter Costentzer múns, der selbun pfenning ich alleklich gewert bin vnd die ich in minen redelichen nutz bekeret han. Vnd send och den selben Cůnrat vnd Annun sine swester ab der Veser Egge ledeklich vnd willeklich bi Hansen dem Fryen burger ze Biscofzelle⁴, der och lehen het von dem gotzhus ze sant Gallen, vnd och mit disem brief vf dem vorgenanden gotzhus an des êrwirdigen mines gena^edigen herren hant Gerien abt⁵ dez selben gotzhus ze dez gotzhus nutz vnd handen, vnd han och gelobt mit miner trúwe, daz ich vnd mine erben der vorgeschribenun lúte vnd och dez koffes ane allen fúrzug vnd ane wider rede reht wern so^ellint sin nach dem rehten, wenn ald wa oder wie dikk sin an herr ald das capitel oder pfleger dez vorgenanden gotzhus ald die vorgeschriben Cůnrat vnd Anne bedurfent ald notdúrftig sint ald werdent, vff gaistlichem ald vff weltlichem geriht. Vnd entzih mich willeklich mit disem brief fúr mich vnd fúr alle mine erben aller reht vorderung ansprach aigenschaft vnd lehenschaft besatzung kuntschaft vnd zúgnúst brief vnd lebenter lúte, so ich ald mine erben zů dero vorgenandun Cůnrat vnd Annun lib ald gůt ie vntz her gehebt hant ald wir hie nach dar zů han ald gewinnen mugint ald mo^ehtint von reht ald von gewonhait oder ân reht dehainen weg. Vnd ze merer sicherhait aller vorgeschribener ding henk ich Johans von Haidelberg ritter min aigen insigel an disen brief. Der geben wart ze Bischofzelle in der stat, an der na^ehstun midechun vor dem hailgen tag ze osterun in dem jar, do von gottes gebúrt warent drútzehenhundert jare, dar nach in dem zwai vnd sehtzigosten jare.

Source Fulltext: Chartularium Sangallense VIII, Nr. 4803, S. 24-25.