Wir Kúnigund von Vatz erborn, gra^euinn von Toggenburg, graf Fridrich der junger, gra^vf Donat, gra^vf Kraft vnd gra^vf Diethelm || gebrůder von Toggenburg kúnden vnd veriehen offenlich mitt disem brief, won v´ns der eruuirdig herre bischof Peter von || gottes gnaden zú Kur die burg Frido^w, den grossen maiierhof ze Zútzers, vsgenomen sechs vnd drissig scheffel gersten, die || vormals den Tumben vnd ir erben dar vs versetzt sint, die maiierho^ef ze Yus vnd zú Fro^euuis lút vnd gůt, all nútz vnd rechtung, die zú der selben burg vnd in die selben ho^ef geho^erent, enend dem hag vnder Aspermont vntz in die Languuar ietuueder halb des Rins zú ainem rechten werenden phant ingúsetzt hett mitt willen wissent vnd gunst der eruuirdigen herren des tůmprobsts des tegans vnd des capittels zú Kur vmb vier hundert vnd vierzig mark Kuruua^elscher marken, ie acht phunt Mail(esch) fúr ain mark gúrait, die wir im vnd sinem gotzhus bar verlihen haben vnd in sines^a) gotzhus offennen nutz komen sint, als die brief¹ wol búuuisent, die wir dar vmb von im haben, das wir vnd v´ns^b) erben, ob wir nit weren, dem obgúnanten bischof Peter sinem nachkomen vnd gotzhus oder dem capittel zú Kur, ob ain bischof nit wêr, die vorgúschriben burg Frido^w mitt allen ir zů geho^erden ze lo^esenn sullen geben ân widerred vmb als vil marken, als vor geschriben stat, in aller der wis vnd mitt allen den rechten, als si v´ns vnd v´nsern erben versetzt ist, wenn wir des von inen gemant werden, an allen fúrzug. Des haben wir dú obgúschriben fro Kúnigund gra^euinn fúr v´ns vnd gra^vf Fridrich vnd gra^vf Donat fúr v´ns vnd die obgúnanten v´nser bru^eder gra^vf^c) Kraft vnd gra^vf Diethelm vnd fúr v´nser erben verhaissen vnd gelobt mitt trúu in aids wis. Es ist aber búdinget vnd búrett, wenn v´ns der obgúnant bischof Peter oder sin nachkom(e) vnd gotzhus oder das capittel zú Kur, ob ain bischof nit wêr, die vorgúschriben phenning richtent vnd werent vor sant Johans tag ze súnuuend, so sullent inen die vorgúschriben burg vnd maiierho^ef mitt allen Zinsen vnd nútzen von v´ns vnd v´nsern erben ga^entzlich vnd ledklich veruallen sin, richtent aber si vns die phenning nach dem selben sant Johans tag, so sullent v´ns die nútz vnd zins des iares veruallen sin an all geuerd. Des zú vrkúnd geben wir dú obgúschriben fro Kúnigund gra^euinn, gra^vf Fridrich vnd gra^vf Donat disen brief búsigelt mitt v´nsern insigeln fúr v´ns vnd fúr die obgeschriben vnser bru^eder gra^vf Kraft vnd gra^vf Diethelmen, vnder dú wir die vorbúnempten gra^vf Kraft vnd gra^vf Diethelm v´ns verbinden, won wir aigenner insigel nit haben. Dirr brief ist geben zú Maiienuelt² in v´nser vesti, do man zalt von gottes gebúrt drizehenhundert vnd sechzig jar, dar nach in dem andern jar, an samstag vor v´nser fro^vuuen tag zú herbst.

Source Fulltext: Chartularium Sangallense VIII, Nr. 4822, S. 40-41.