Ich Hans der Morgen vnd ich Cůntz von Múnchwille¹ wir vergehen vnd tůn kunt offenlich mit || disem brief, daz der hochwirdig fúrst bischof Johans von Gurk² vnsrer gnedigen herren der hertzogen || von O^ester(rich) kantzler vnd ze disen ziten ir houptman vnd lantvogt ze Swaben vnd in Elsazz mit || vns v´berein komen ist, daz wir gelopt haben mit vnser trewen an eides statt vnd loben ouch mit disem brief, daz wir den vorgenanten vnsern herren von O^ester(rich) vnd an ir statt dem egenanten irem kantzler oder wer denn ir obrister houptman ist in den vorgenanten iren landen getrewelich vnd endlich warten vnd dienen sullen mit vnser selbs liben vnser ietwedere mit einem helme selbander gewappent wider aller menklich nieman vsgenomen vntz vff den nehsten sant Gallen tag vnd dannanthin ein gantzes jar, vnd dar vmb vnd fúr sold vnd koste sullen vns geuallen von den vorgenanten vnsern herren von O^ester(rich) vnd iren erben drúhundert guldin gůter vnd genemer Florentiner gewicht, dero man vns den halbteil richten sol vff den nehsten sant Georijen tag, vnd den andern halbteil sol man vns gelten darnach vff den nehsten sant Gallen tag. Waz wir ouch in der vorgenanten zit redlicher verlust nemen an rozzen vnd an hengsten wizzentlich vff dem velde in der vorgenanten vnsrer herren von O^ester(rich) dienste, daz sullen vns die selben vnser herren von O^ester(rich) gelten vnd vsrichten nach irem alten gewonlichen anschlag vnd alz si denn ze male andern irn dienern tůnd vngeuarlich, vnd sol ouch vns des von inen wol benu^egen. Vnd des ze warem vrkúnde hat vnser ietwedere sin eigen ingesigel offenlich gehenket an disen brief. Der geben ist ze Schafhusen³ an samstag nach des heiligen crútzes tag ze herbst, nach gots geburt drútzehen hundert vnd sechtzig jaren vnd darnach in dem andern jare.

Source Fulltext: Chartularium Sangallense VIII, Nr. 4826, S. 43.