Wir Jacob von gottes verhengniss besta^eter abt des gotzhus von Vischinen¹ sant Benedicten Ordens in Cost(enzer) bistům veriehen vnd tůnd kunt mit disem brieff allen, die inn ansehent lesent oder ho^errent lesen, vmb die sto^ess, so der erber herre abt Heinrich von gottes verhengnust besta^eter abt des gotzhus ze Rúti² des Ordens von Premonstr(ey) in Cost(enzer) bistům vnd Eberhart der Torman von Trůngen³ mit einandern hatten, der sto^essen si beidenthalben vff v´ns als ze einem gemeinem man komen waren, das wir da den vorgenempten abt Heinr. vnd den vorg(enempten) Eberhart den Torman lieplich vnd gu^etlich gar vnd gentzlich mit einandern bericht haben, als hienach geschriben stat. Das der vorg(enempt) Eberh. dem vorg(enempten) abt Heinrichen vnd dem gotzhus ze Rúti fúr den schaden, den si empfangen hand von der akern wegen, die inen der selb Eberh. der Torman ansprechig hatt, als hienach geschriben stat, geben hat fúnff pfund Cost(enzer) pfenning, der si ouch gantzlich von im gewert sind, vnd das ouch der vorg(enempt) Eberh. Torman geschworn hat einen gelerten eid ze den heilgen mit vfgehepter hand fúr sich vnd fúr alle sin erben, das er noch sin erben den vorg(enempten) abt Heinr. noch sin nachkomen noch das vorg(enempt) gotzhus Rúti an den nachg(enempten) akkern ein halb juchart akker gelegen ze Trůngen in dem hoff enzwúschent Peter des Schmids aker von Wil⁴ vnd des Lampreswilers akker von Trůngen, die er inen ansprechig hatt, nu hinnenhin niemer me gesumen geirren noch ansprechen sol weder mit worten noch mit werken noch mit geistlichem noch mit weltlichem gericht noch a^vn recht, vnd dz ouch er noch sin erben den vorg(enempten) abt Heinrichen noch sin nachkom(en) noch dz vorg(enempt) gotzhus noch dehein ir lút noch ir gůt von der sach wegen niemer mer geschadgen sond weder mit gericht noch a^vn recht noch mit keinen andren dingen. Wer aber, dz er ald sin erben das v´berfu^eren, als vor(geschriben) ist, vnd den vorg(enempten) abt Heinr. ald sin nachk(omen) ald das vorg(enempt) gotzhus ald dhein ir lút ald gůt ze deheinem schaden brechten von der vorg(enempten) sach wegen, den schaden man kuntlich ko^vnd gemachen, als recht were, so ist der vorg(enempt) Eberhart der Torman ald sin erben, die denn das v´berfu^eren, dem vorg(enempten) abt Heinr. sinen nachkom(en) ald dem vorg(enempten) gotzhus ze Rúti XII lb. Cost(enzer) pfenning verfallen vnd gebunden ze geben. Vnd des ze einer warheyt so haben wir abt Jacob da vorg(enempt) v´nser insigel off(enlich) gehenkt an disen brieff, darnach vergich ich Eberhart Torman da vorg(enempt) ein gantz warh(eyt) aller vorg(eschriben) dingen, vnd ze merer sicherheyt der selben ding so hab ich mich verbunden vnd bind mich mit disem brieff vnder mines vorg(enempten)^a) herren abt Jacobs des gotzhus ze Vischinen insigel, won ich eigen insigels nit enhan. Der geben ist an zinstag vor Vrbani anno domini M°CCC°LXII°.

Source Fulltext: Chartularium Sangallense VIII, Nr. 4811, S. 30-31.