Allen, die disen brief ansehent oder ho^erent lesen, kv´nde ich Peter Mangolt burger ze Costentz vnd vergih des offen||lich mit disem brief, das ich willeklich vnd mit gůter vorbetrahtung nach miner gůten frúnde vnd ander erber || lúte rate min aigen gůt, das man nemmet ze den Schmitten¹, mit akker mit wisan mit holtz vnd mit velde || vnd mit gemainlichem vnd svnderlichem mit allen rehten mit aller ehafti mit allen nv´tzen vnd gewonhaiten, die zů dem selben gůt ho^errent vnd geho^erren mvgent, si sigint benempt ald vnbenempt gesůcht ald vngesůcht, fúr ain reht aigen reht vnd redelich ze ko^effent geben hab vnd gib es ze ko^effent mit disem brief dem beschaiden manne Egelolfen dem Blarrer burger ze Costentz vnd allen sinen erben vmb vierú vnd drissig phvnt vnd fúnf schilling phenning gv^oter vnd gena^emer Costentzer mv´nss, der ich von im gar vnd ga^entzlich gewert bin vnd die in minen redelichen nvtz komen vnd bekert sint, als ich vergih offenlich mit disem brief, vnd hab disen ko^vff gen im vnd gen allen sinen erben vnd nachkomen getan vnd vollefu^ert mit aller der gehúgde worten vnd werken, die dar zů horrent vnd geho^erren mvgent von reht oder von gewonhait des landes. Ich hab mich och gen dem selben Egelolfen dem Blarrer gen allen sinen erben vnd nachkomen vertzigen vnd vertzih mich des mit disem brief fúr mich vnd alle min erben vnd nachkomen, das ich noch nieman von minen wegen ze dem vorgenanten gůt nv hinnanhin niemer mer kain vorderung noch ansprach haben noch gewúnnen so^ellin weder mit gaistlichem noch weltlichem geriht noch a^vne geriht noch mit kainer slaht ander sach, da mit ich vnd min erben vnd nachkomen den vorgenanten hoff nv oder her nach mo^ehtint wider tůn oder vollebringen. Ich vergih och mit disem brief, das ich vnd min erben vnd nachkomen des obgenanten Egelolfes des Blarrers siner erben vnd nachkomen des vorgenanten gůtes vnd des ko^effes fúr ain reht ledig aigen wern sin so^eltint gen aller ma^enlichem nach reht. Vnd des ze warem vnd offem vrkúnde vnd sta^eter sicherhait alles des, so hie vor an disem brief geschriben stat, gib ich der vorgenant Peter Mangolt fúr mich vnd min erben vnd nachkomen dem obgenanten Eglolfen dem Blarrer sinen erben vnd nachkomen dar v´ber disen brief mit minem aigen insigel besigelten. Der ist ze Costentz geben, do man von Cristes gebúrte zalt drv´tzehenhundert iar, dar nach in dem drú vnd sehtzigosten iar, an dem na^ehsten fritag nach dem hailigen tag ze wihenna^ehten.

Source Fulltext: Chartularium Sangallense VIII, Nr. 4843, S. 59.