Allen, die disen brief ansehent lesent oder ho^erent lesen, kúnd ich Jacob Brand vnd vergich offenlich mit disem brief, das fúr || mich kament, do ich offenlich ze geriht sass an des ammans stat ze sant Gallen, Mêhthild V^olrich Hofakrers elichi wirtinn || vnd Elsbeth Johansen Hofakrers elichi wirtinn mit den selben ir elichen mannen, vnd nament mit den selben elichen mannen || willen Andres den Entziswiller burger ze sant Gallen ze fúrsprech, der offnot da offenlich vor geriht an ir stat vnd von iro wegen vnd sprach, si hettin den hof ze O^ettenhûsen¹ vnd das gůt, das man nemmet des Frigen gůt, vnd das gůt im Ristal², dú sú von ir vatter sa^eligen anerstorben warent, mit akkern mit wisen mit waiden mit holtz mit veld mit steg mit wegen mit wasser mit wasserflússen vnd mit allen rehten vnd zů geho^erden, so zů den vorgenemten gu^etern geho^erent von reht vnd von gewonhait, der ersamen gaistlichen frowen der a^ebbtissinen vnd dem conuent gemainlich ze Tênnikon³ reht vnd redlich vnd mit gůter vorbetrahtung ze ko^vffenn geben vmb aht vnd viertzig phunt phenning gůter Costenzer múns, der selben phenning sú o^vch von dem egenemten conuent gantzlich gewert vnd an ir offenn nutz bekert wa^erint, vnd wo^eltint o^vch von den egenemten gu^etern gan vnd sich der entzihen gantzlich vnd dú dem egenemten conuent ze Tênnikon vêrtgon, vnd batt mich eruarn an gemainer^a), wie si das tůn so^eltin, das ez nu vnd hie nach kraft hett, das tet ich, vnd wart mit gesamnoter vrtail vrtailt, das die egenemt Mêhthild vnd Elsbeth ietwedri ainen vogt mit ir elichen mannen willen an des gerihtes ring nemen so^eltin vnd mit der selben vo^egt handen dú egenemten gu^eter mit allen rehten vnd zů geho^erden dem egenemten conuent vêrtgon vnd v^f geben mit des gerihtes stab, nach dem so si ir vo^egt ze drin mâlen vsser des gerihtes ring fu^ertin vnd si frâgtin, ob si das willeklich vnd vnbetwungenlich vnd gern ta^etin vnd tůn wo^eltin. Do nam die egenemt Mêhthild Jacob den Růpreht burger ze sant Gallen mit ir elichen mannes willen ze vogt, vnd die egenemt Elsbeth nam Hainrich den Blârrer o^vch burger ze sant Gallen vnd o^vch mit ir elichen mannes willen ze vogt. Die selben vo^egt fu^erten si ze drin mâlen vsser des gerihtes ring vnd frâgten si, ob si ez gern willeklich vnd vnbetwungenlich ta^etint vnd tůn wo^eltint. Die selben vo^egt saiten bi ir aiden, dz si ez willeklich vnbetwungenlich vnd gern ta^etin vnd tůn wo^eltint. Darnach do gaben die egenemten Mêhthild vnd Elsbeth mit ir egenemten vo^egt handen vnd mit des gerihtes stab willeklich frilich vnd letklich die egenemten gu^eter mit allen rehten vnd zůgeho^erden, als vorgeschriben ist, dem erbern Eberhart dem Hůber des egenemten conuentz ammann, der o^vch da vor geriht ze gêgni was, an des egenemten conuentz stat ze Tênnikon v^f. Darnach do batt mich der egenemt ir fúrsprech eruarn an gemainer vrtail, ob dis also beschehen wa^er, das ez kraft mo^eht han nu vnd hienach, das tet ich, vnd wart ertailt, dz ez also beschehen wa^er, daz ez wol nu vnd hienach kraft haben mag, vnd ist dis alles beschehen vnd vollfu^ert mit worten vnd mit werken, so darzů gehorten vnd notdurftig warent von reht vnd von gewonhait. Vnd des alles ze ainem wâren vrkúnd so han ich Jacob Brand rihter da vorgenemt min insigel gehenkt an disen brief, won ez o^vch ertailt wart, das ich ez tůn so^elti. Wir die egenemten Andres Êntziswiller fúrsprech, Hainrich Blârrer vnd Jacob Růpreht burger ze sant Gallen vo^egt, als vorgeschriben sta^vt, veriehen offenlich an disem brief, das alles das wâr ist, das der egenemt Jacob Brand rihter von vns veriehen hât an disem brief. Vnd des ze merer sicherhait so haben wir o^vch vnsrú insigel gehenkt an disen brief. Dis beschach vnd wart dirr brief geben an sant Katherinen abent in dem jar, do man zalt von Cristus geburt drúzehen hundert jar vnd darnach in dem zwai vnd sehszigosten jar.

Source Fulltext: Chartularium Sangallense VIII, Nr. 4834, S. 50-51.