Ich^a) Albreht Motzze der elter bnrger ze Kemptun¹ kúnde vnd vergich offenlich fúr mich vnd fúr min erben an disem brief allen den, die in ansehent oder ho^erent lesen, daz ich mit gůter williger vorbetrahtung gesunt libs vnd der sinne ze den ziten vnd ze den || tagen, do ich ez wol getůn vnd volbringen moht, dem erberen frummen man Hainrich dem Haintzel von Ysni² burger ze Lyndôwe³ vnd allen sinen erben min gůte ze dem Thegerstain⁴ vor Lyndôwe gelegen, daz wilunt Berhtolt dez Motzzen von Kemptun || sa^eligen waz, da der ander halbe taile dez selben gůtes hiut ze tag Hainr. dez Furers burger ze Lindôwe ist, daz selbe gůt von dem abt vnd von dem gotzhus ze sant Gallen lehen ist, vnd min zwein taile dez gůtes ze dem Thegerstain, daz Ha^enni || Gra^euelis waz, dez selben gůtes hiut ze tag ain drittail ist Chůnr. dez Pregentzers burger ze Lyndôwe, daz lehen ist von dem vesten man Ma^erken von Schellenberg⁵ von Wasserburk⁶, vss dem selben gůt Johans A^edelin burger ze Lyndôwe ain êwig fůder wins geltes iâ^erlich gat vnd gan sol, dez selben fůder wins ich Albreht Motzze obgenanter han geben diu zwai taile vnd Chůnr. Pregentzer daz drittaile, diu vorgenanten minu baidiu gůte mit wingarten mit torkeln mit tailern mit Zinsen mit akkern mit wisen mit dem wiger mit twingen mit ba^ennen mit gerihten mit allem gelte mit allen nútzzen gewonhaiten vnd rehten vnd mit allen zů geho^erden besůchtz vnd vmbesůchtz bewistz vnd vmbewistes vnder erde vnd ob erde, als diu selben obgenanten gůte an mich komen vnd braht sint vnd alz ich die daher inne gehebt vnd genossen han, aynes rehten redlichen vngeuarlichen vnd ewigen koffs ze koffent han geben, alz reht ist vnd kraft hat, vmbe vierhundert pfunt vnd ahtzig pfunt Pfenningen alles genger vnd gůter Costentzer múnse, dez gůtes ich von im alles gewert vnd bezalt bin gar vnd ga^entzlich, daz selbe gůt och alles in minen redlichen vnd gůten nutzze komen vnd bekert ist nach minem gůtem willen vnd nutzze, vnd han im vnd sinen erben die vorgenanten gůte mit allen rehten vnd zůgeho^erden geuerggot vnd vff geben vnd mit lehenschaft in ir han de vnd gewalt braht nach lehens reht mit miner gena^edigen herren hande abt Georien von sant Gallen⁷ vnd mit Ma^erken von Schellenbergs von Wasserburk, mit der willen vnd gunst vnd mit ir han den dirre koff zů gegangen ist vnd volfu^eret. Ich vnd min erben, ob ich enwa^er, sullent och vmb diu vorbenempten gu^eter vnd waz dar zů geho^eret vnd och dis vorgeschriben rehten redlichen vnd ewigen koffs dez vorgenanten Hainr. dez Haintzels vnd siner erben vff gaistlichem vnd weltlichem geriht gen allerma^enclich vnd an allen stetten iro reht weren sin nach dem rehten vnd nach lehens reht ane alle geua^erde. Vnd ze ainer merun sicherhait so hab ich dem selben Hainr. dem Haintzel vnd sinen erben zů mir vnd minen erben dar vff vnuerschaidenlich ze rehten geweren geben vnd gesetzt die ersamen lúte min gůt frunde Joh. den Truben vnd Ru^eppen Ru^eppreht burger ze Ysni, Symon Berhtolt genant der altamman von Lutkirch⁸, Ha^enni Dietrich burger ze Kemptun, Hainr. den Furer vnd Chůnr. von Engen⁹ burger ze Lyndôwe, also vnd mit so^ellicher beschaidenhait vnd bedingde, ob in oder sinen erben die selben vorbenemten gůte von iemant anspra^echig wrdent mit dem rehten gar oder ain tail, ez wa^er vff gaistlichem oder vff weltlichem geriht, daz súllent ich vnd die obgenanten min geweren vnd v´nser aller erben im vnd sinen erben vssrihten ane allen iren schaden, vnd súllent si dar vmb verstan vnd versprechen vff gaistlichem vnd weltlichem geriht vnd an allen stetten vnd si der ansprach ledig machen ane allen iren schaden. Ta^etten wir aber dez nit vnd mu^estend si sich selber dar vmb verstan vnd versprechen, koment si dez vnd da von ze schaden, ez si von clag von zerung von bottenlon von pfandung oder von versprechent, den selben schaden súllent ich vnd die obgenanten min geweren vnd v´nser aller erben im vnd sinen erben abtůn vnd vssrihten ane allen iren schaden, vnd hat der selb Hainr. der Haintzel vnd sin erben gewalt vnd reht, mich vnd min erben vnd min obgenant geweren vnd alle ir erben v´ns alle gemainclich vnd ieglichen sunderlich dar vmb ze no^etend vnd ze pfendent an lúten an gůten mit clag oder ane clag mit geriht oder ane geriht gaistlichs vnd weltlichs, wie vnd wa si v´ns dar vmb wol pfenden vnd no^eten mugent in stetten in gerihten vnd vf dem lande vnd och v´ber alle búnde burgerreht frihait gesetzen vnd lantfride vnd och v´ber gaistlichs vnd weltlich geriht, alz oft vnd alz vil hintze vff die stunde, daz inen von v´ns ist vssgeriht an allen iren schaden alles daz, dar vmb si v´ns gepfent vnd geno^et habent. Ich vergich, daz ich mich verzich an disem brief fúr mich vnd min erben gen dem selben Hainr. dem Haintzel vnd gen allen sinen erben an dem vorbenempten gůten ze dem Thegerstain vnd an allem dem, so dar zů geho^eret, als da vor wol verschriben vnd benempt ist, aller aigenschaft aller lehenschaft aller vordrung aller ansprach aller gewaltsami alles schirmes alles vsszugs aller briefe, si sigent erworben ald mo^ehtend hernach erworben werden, vom stůle von Rome oder anderswannan, dar zů alles rehtes gaistlichs vnd weltlichs rehtz vnd gerihtes vnd alles v´nsers rehten vnd aller der dinge, da mit ich oder min erben vnd nachkomen ald ieman ander von v´nsren wegen die vorgenanten gůte vnd waz dar zů geho^ert kundent ald mo^ehtend wider an gesprechen ald dis rehten redlichen vnd ewigen koffs kúndent oder mo^ehtend widerkomen ald den in dehain wise gewenden bekrenken oder gebrechen sust oder so, vnd ist dirre vorgen(ante) koff vnd diu vorgenante vertggun beschehen vnd volfu^eret offenlich mit aller der offennung behúgde vnd ordnung worten werken vnd geta^eten vnd mit aller der kraft, so von gaistlichs oder von weltlichs rehten wegen dar zů geho^ert vnd notdúrftig waz vnd alz reht ist, ane alle geua^erde. Ich vorgenanter Albreht Motze han den vorgenanten geweren gelobt bi gůten truwen, daz ich vnd min erben si vnd ir erben von dirre obgeschriben gelúbde vnd werschaft súllent lo^esen ane allen iren schaden, vnd koment si der werschaft ze schaden, den sont wir in och abtůn vnd vssrihten ane allen iren schaden, vnd sont vnd mugent si vnd ir erben mich vnd min erben vmb den schaden pfenden vnd no^eten mit gaistlichem vnd weltlichem geriht alles lange, hintz inen der schade wirt vssgeriht ane allen iren schaden. Vnd dez alles ze ainer warhait vnd ze vrkúnd vnd ze ainer êwigun sta^etkait aller vorgeschriben dinge so han ich vorgenanter Albreht Motzze dem vorgenanten Hainr. dem Haintzel vnd allen sinen erben disen brief fúr mich vnd min erben besigelt mit minem aigen insigel. Wir die obgenanten geweren alle habent gelobt v´nser ieglicher besunder mit siner truwe in aydes wise, dise vorgenante gewerschaft sta^et ze hende vnd ze laistend mit allen den stukken vnd búnden, alz da vor geschriben ist, daz selbe sont v´nser erben och tůn, ob wir enwa^erent. Vnd dez ze vrkúnde habent wir och v´nser aigen insigel gehenkt an disen brief. Dirre brief ist geben do man zalt von gotes geburt druzehenhundert iar vnd zwai vnd sehtzig iar, an dem na^ehsten fritag vor sant Gallen tag.

Source Fulltext: Chartularium Sangallense VIII, Nr. 4828, S. 44-46.