Wir Vrsella geborn von Vatzz grefin von Werdenberg von Sanegans vnd ich graue Johans ir sun veriechent vnd tu^egent kunt offenlich vnd menklich || mit disem brief, dz wir wilklich vnd gern mit gůter vorbetrachtung nach erber vnser frúnden rat habent recht vnd redlich ze ko^vffen geben dem edelen herren || graf Friderich von Thogenburg dem eitern vnd der edelen wolgebornen fro^vwen fro Kúngv´nden geborn von Vatz grefin von Thogenburg vnd allen iren erben vnsern || lieben gůtten frúnden daz tal, daz da geheissen ist Schanfigge, gelegen in Curer bistůmb, mit lút mit gůt mit zwing mit benn mit allen gerichten stokk vnd galgen mit wun mit weid mit holtz mit veld mit aker mit wisen mit wasen mit zwi mit wasser mit wasser rúnsi mit steg mit weg mit wildbann fliegentz fliechentz vnd fliessentz mit allen nútzen vnd rechten vnd gewonheiten vnd ehafti vnd mit aller zů geho^ernd, als wirs da her bracht ingehebt vnd genossen habent, an allein alle von Vnderwegen¹, Johansen Schanfiggen, Annen sin swester vnd Bellinen genand Schanfigg seshaft ze Êmptz², die mit namen in den ko^vff nit ho^eren sont vnd wir vns selber vor vsbenempt habent, vmb tusund pfunt pfenning gůter vnd genemer Costentzer múntzz, vnd die wir alle von in enpfangen habent vnd in vnsern gůten redlich nútzz komen vnd bewendet sint, vnd habent o^vch wir die vorgen(ant) grefin Vrsella von Werdenberg von Sanegans vnd ich der vorgenant graf Johans ir sun vnd vnser erben der egenanten stuk aller von einem an dz ander gelobt vnd súllen der selben stuk gůt wern sin an geistlichem vnd an weltlichem gericht nach recht vnd wa vnd wenne si sin bedurffent oder noturftig werdent, an geuerde, eigen nach eigem recht, lechen nach lechens recht. Wir die vorgeschriben Vrsell grauin von Werdenberg von Sanegans han o^vch gelopt mit gůten trúwen vnd ich der egenant graf Johans han o^vch gesworn einen eid ze den heilgen mit gelerten wortten vnd mit vf gehabner hand, also were dz es sich erpfunde, dz vnder den egenanten stuken in dem selben tal Schanfigg keyn stuk lechen were, wenne wir denne oder vnser erben von inen oder von iren erben des ermant werdent, daz selbe stuk, dar vmbe wir denne gemant sient, dz denne lechen ist, dz súllent wir inen denne vertgen vnd dar nach werben vnd fúrderent sin bi der selben gelúbde nach lechens recht an alle geuerde. Wir die egen(ant) greuin Vrsella von Werdenberg von Sanegans veriechent an disem brief, dz wir disen vorgenanten ko^vff vnd ellú stuk, als vorbescheiden ist, mit des erbern knechtz V^olrichs von Haldenstein gůten willen vnd gunst getan vnd volfu^ert habent, wan er vmb dis sach vnd ko^vff vns mit gericht vnd mit vrteild ze einem erkornen vogt geben ward, als vrteild vnd recht gab, vnd habent den selben V^olrichen von Haldenstein erbetten, dz er sin insigel gehenkt hat an disen brief ze einer bezúgnust der vorgeschriben dingen. Wir Vrsella grauin von Werdenberg von Sanegans vnd ich graf Johans ir sun die ebenempten veriechent offenlich alles des, so hie vor^a) v´ns an disem brief gescriben sta^et, stet ze hanne alles dz bi der selben gelúbde, als hie vor geschriben stat, vnd dar vmbe so habent wir vnserú ingesigel offenlich gehenkt an disen brief ze einer steten sicherheid der vorgeschriben dingen. Ich V^olrich von Haldenstein vergich, dz ich von bette wegen der edelen miner genedigen fro^vwen greuin Vrsellen von Werdenberg von Sanegans min insigel gehenkt han an disen brief in vogtz wiss, wan ich ir mit vrteild vnd mit recht ze einem erkornen vogt v´ber dis sach geben vnd erteilet ward, vnd dz der selbe ko^vff mit minem gůten willen vnd gunst gentzlich beschechen vnd volfu^ert ist. Dire brief ist geben vnd ward dire ko^vff volfu^ert ze Meiienveld³, da man zalt von gottes gebúrt drúzechen hundert jar vnd dar^b) in dem drú vnd sechtzigosten jare an dem nechsten fritag an vnser fro^vwen abund zer ern in dem mertzen.

Source Fulltext: Chartularium Sangallense VIII, Nr. 4866, S. 78-79.