Allen den, die disen brief ansehent oder ho^erent lesen nv vnd hienach ewichlich, tun chunt ich Etzel von End korherr ze Brichsen¹ vnd vergihe || offenlich fu^er mich vnd mein erben, daz ich wol mugend vnd gewaltig leibes vnd der sinne nach gueter vorbetrachtung durch meins || nutzes vnd notdurfft willen zu der zeit vnd an den stetten, do ich das wol getůn mocht, freyleich vnd vngetwungenlich verchaufft hab || recht vnd redleich vnd verchouffe ouch mit disem brief fu^er mich vnd mein erben den hochgeborn fu^ersten meinen genêdigen herren hertzog Růdolfen, hertzog Albr. vnd hertzog Leuppolten gebruedern hertzogen ze O^estereich² ze Steyr vnd^a) ze Kernden grafen ze Tyrol vnd i^eren erben meinen tail an der vesten ze Grymmenstain³ vnd alles das, das darzu^e geho^ert, ez sein leut gueter gericht twinge benne vischwaid wazzer stege wege wunne waide vnd mit aller andrer zu^egeho^erung, wie di genant ist, gesucht vnd vngesucht gestifft vnd vngestifft vmb viertzig guldein iêrliches geltes gueter der gewicht von Florentz leibdinges, die si mi^er versichert vnd auf gewizzen stetten auzgericht habent, vnd gibe in dem namen als da vor vollen vnd gantzen gewalt meinen egenanten herren vnd i^eren erben meinen tail an der egenanten veste ze Grymmenstain vnd alles das, das dartzů geho^ert, ze besitzend innezehabend ze niezzend ze besetzend vnd ze entsetzend ewichlich als ander i^er vest vnd gueter, vnd gelob ouch fu^er mich vnd mein erben, disen chouf stêt vnd vest zehabend ewichlich mit gu^eten trewen vnd dawider nymmer ze tůnd noch schaffen ze tůnd haimlich oder offenlich mit gericht noch an gericht in dhainen weg an alle geuêrd. Vnd vertzeihe mich ouch mit gueter wizzend fu^er mich vnd mein erben meins tails der egenanten vesten ze Grymmenstain vnd alles des, das dartzů geho^ert, vnd alles des rechten ansprach vnd vordrung, die ich oder yemt von meinen wegen dartzů haben mo^echten in dhainen weg, vnd ouch hilffe geistleicher vnd weltlicher gerichte aller rechte freyhaiten auszuge schirmvng vnd fv´nde geschribner vnd vngeschribner, mit den ich mein erben oder yemt von vnsern wegen tůn mo^echten in dhain weg wider den vorgenanten kouff oder wider dhain ding, das da vor beschaiden ist, vnd svnderlich dem rechte, das da sprichet, gemain vertzeihvng veruahe nicht, ez ge danne dar vor ain svnderlich vertzeihvng, an alle geuêrd. Vnd des ze vrchund sicherhait vnd getzeugnusse der vorgeschriben dinge hab ich der egenant Etzel von End mein insigel gehenchet an disen brief. Der geben ist ze Brichsen an mêntag vor sand Mathias tag des zwelfbotten nach Kristes gepu^erd dreutzehen hvndert iar, darnach in dem drew vnd sechtzigisten jare.

Source Fulltext: Chartularium Sangallense VIII, Nr. 4859, S. 70.