Ich Johans von Staina statamman¹ ze sant Gallen kúnd vnd vergich offenlich mit disem brief allen, die in ansehent lesent oder ho^erent lesen, das fúr mich kament ze sant Gallen in der stat, do ich offenlich || ze geriht sass, V^olrich Hofakrer burger ze sant Gallen mit Mêhthilten siner elichen wirtinnen ainhalb vnd Hilpolt von Witunwille² burger ze Wîl³ an Margarethun Burkartz des Zugmans von Lieh||tenstaig⁴ elichen tohter Diethelmen des Smides sa^eligen von Liehtenstaig wîlunt elicher husfrowen stat andrenthalb, vnd nament die vorgenemten V^olrich Hofakrer vnd Mêhthild sin wirtinne Jacob den Rů||preht burger ze sant Gallen Albreht Vo^elis tohterman ze fúrsprechen. Der offnot da vor mir vnd dem geriht an ir stat vnd von ir wegen vnd sprach, das sú mit gůter vorbetrahtung vnd mit wolbedahtem můt reht vnd redlich der vorgenemten Margaretun ze ko^vffenn geben hettint nún mutt kernen Wîler messes ja^erkliches geltes vss dem zehenden ze Erchingen⁵ vmb sehszig phunt vnd drú phunt phenning gůter Costentzer múns, der selben phenning sú o^vch von ir gantzlich gewert wa^erint vnd enphangen vnd an ir offenn nutz bekert hettint, vnd hettint o^vch der egenemten Margaretun die vorgeschribenn nún mutt kernen ja^erliches geltes ze ko^vffenn geben mit der beschaidenhait, das si vnd ir erben vnd nachkomen, ob si enist, die vorgeschriben nún mutt kernen ja^erlichs geltes vss dem vorgeschribenn zehenden ze Êrchingen eweklich aller ja^erlich in nemen haben vnd niessen sont in aller der wîs vnd in allen dem rehten, als o^vch sú vnd ir vordern die selben nún mutt kernen ja^erlichs geltes ingenomen gehept vnd genossen hant vntz vff disen húttigen tag vnd als der brief bewîset, den ir vordem darvrnb von den êrwirdigen herren dem abt vnd von dem cappittel gemainlich des gotzhus in der Rîchen O^vw⁶ hant, vnd woltint sich o^vch der vorgeschribnen nún mutt kernen ja^erliches geltes gantzlich vnd luterlich entzihen vnd der egenemten Margaretun bi dem egenemten Hilpolden vêrtgon vnd ze ir handen bringen, als vrtail vnd reht ga^eb, vnd batt mich der vorgenemt Jacob Růpreht ir fúrsprech eruarn an gemainer vrtail, wie sú das tůn soltint, das ez krafft hett nu vnd hienach. Das tet ich vnd wart mit gesamnoter vrtail ertailt, das die vorgenemt Mêhthild des egenemten V^olrich Hofakrers elichi wirtinn mit des selben ir elichen mannes willen ainen vogt nemen so^elt an dem geriht, wen si wo^elt, vnd das dann darnach der egenemt V^olrich Hofakrer mit siner hant vnd die egenemt Mehthild sin wirtinn mit ir hant vnd mit ir vogtes hant die vorgeschriben nún mutt kernen ja^erlichs geltes an des riches offner strâss fúr aigen der egenemten Margaretun bi dem vorgenemten Hilpolden v^fgeben vnd vêrtgon soltint, nach dem so der vogt die vorgenemten Mêhthilden ze drin mâlen vsser des gerihtes ring fůrti vnd si fragti, ob si ez willeklich vnd vnbetwungenlich ta^et vnd tůn wo^elt, vnd wenn das also bescha^eh, das o^vch das dann krafft hett. Do nam die vorgenemt Mêhthild Andres den Entziswiller o^vch burger ze sant Gallen mit des egenemten ir elichen mannes willen in diser sach ze vogt. Der fůrt si ze drin mâlen vsser des gerihtes ring vnd fragt si ze drin malen, ob sie willeklich vnd vnbetwungenlich die vorgeschriben nún mutt kernen ja^erklichs geltes der vorbenemten Margaretun bi dem egenemten Hilpolden v^fgeben vnd ze ir handen bringen wo^elt. Der selb ir vogt sait bi sinem aid, das si ez willeklich vnd vnbetwungenlich ta^et vnd tůn wo^elt. Darnach do giengen die vorgenemten V^olrich Hofakrer, Mêhthild sin wirtinn vnd Andres Entziswiller ir vogt an des riches offen strâss vnd gabent da luterlich vnd willeklich mit wolbedahtem můt vnd an all geua^erd der egenemten Margaretun bi dem vorbenemten Hilpolden die vorgeschriben nún mutt kernen ja^erklichs geltes vss dem zehenden ze Erchingen mit allen den rehten, als o^vch sú vnd ir vordern die selben nún mutt kernen ja^erklichs geltes vntz vff disen húttigen tag ingenomen vnd genossen hant vnd als vorgeschriben stât, an ir hant vf vnd entzigen sich willeklich vor geriht vnd hant sich o^vch entzigen mit disem brief fúr sich vnd fúr all ir erben gen der egenemten Margaretun vnd ir erben vnd nachkomen vnd gen allen den, in der hant dú vorgeschriben nún mutt kernen ja^erlichs geltes iemer koment vnd braht werdent, aller aigenschaft aller lehenschafft aller reht ansprach vnd vordrung, so sú zů den vorgeschribnen nún mutt kernen ja^erlichs geltes ie gehattent ald iemer gewinnen mo^ehtint mit gaistlichem ald mit weltlichem geriht, vnd entzigen sich darv´ber alles schirmes alles v^szuges vnd aller brieue, sie sient erworben oder noch erworben wurdint, da mit sú oder ieman von ir wegen die egenemten Margaretun ald ir erben vnd nachkomen oder die, in der hant die vorgeschriben nún mutt kernen ja^erlichs geltes koment vnd braht werdent, an dem selben ja^erlichen gelt vnd an des selben geltes ko^vff sûmen ald irren mo^eht in dekainen weg. Darzů hât o^vch die vorgenemt Mêhthild des egenemten V^olrich Hofakrers elichi wirtinn offenlich vor geriht willeklich vnd mit gůter vorbetrahtung ainen gelerten aid gesworn ze den haiigen mit v^fgehabnen vingern, das si noch ieman von ir haissens wegen die vorgenemten Margaretun noch ir erben noch iemann, in des hant die vorgeschribenn nún mutt kernen ja^erlichs geltes iemer koment vnd braht werdent, an den selben nún mutt kernen ja^erlichs geltes niemer angesprechen sûmen noch irren wil weder mit gaistlichem noch mit weltlichem geriht noch ân rêht, won ez o^vch mit gesamnoter vrtail ertailt wart, das si des swêren so^elt. Ez wart o^vch mit gesamnoter vrtail ertailt, wa^er das ez sich hie nach enphunde, das die vorgeschriben nún mutt kernen ja^erlichs geltes lêhen wa^erint, so sont die vorgenemten V^olrich Hofakrer vnd Mêhthild sin elichi wirtinn vnd ir erben, ob sú ensint, der egenemten Margaretun vnd ir erben ald dem, in des hant die vorgeschriben nún mutt kernen ja^erlichs geltes braht werdent, vêrtgon vnd ze ir handen v^fgeben vor dem lêhenherren, als dann vrtail vnd reht gît, vnd sont das tůn darnach inwendig dem na^ehsten manot, wenn sú darvmb von in ermant werdent ze hûs ze hof ald vnder o^vgen. Vnd ist dis alles beschehen, als vrtail vnd reht gab vor geriht. Vnd des ze ainem wâren vrkúnd vnd gantzer sicherhait so han ich Johans von Staina statamman da vorgenemt min insigel, won ez o^vch ertailt wart, gehenkt an disen brief. Wir die vorgenemten V^olrich Hofakrer, Mêhthild sin elichi wirtinn, Jacob Růpreht fúrsprech vnd Andres Entziswiller vogt, als vorgeschriben stât, veriehen offenlich an disem brief, das alles das wâr ist, das von vns an disem brief vorgeschriben stât, vnd des ze mêrer sicherhait so haben wir o^vch vnsrú insigel gehenkt an disen brief. Der geben ist an dem na^ehsten mêntag nach sant Ambrosius tag in dem jar, do man zalt von Cristus geburt drúzehenhundert jar, sehszig jar vnd darnach in dem dritten jar.

Source Fulltext: Chartularium Sangallense VIII, Nr. 4869, S. 80-82.