Nycolaus thesaurarius¹, Conradus cantor² totumque capitulum ecclesie sancti Johannis Constantiensis omnibus || presentium inspectoribus salutem in domino cum noticia subscriptorum. Quia sagax humane nature discretio memoria || hominum labilitate pensata provide adinvenit, ut ea, que inter homines aguntur, scripturarum testimonio perhennentur || et ad posteros perducantur, ne effrenata cupiditas pacis emula et mater litium humani federis ins extinguat et humanum genus litibus et discordiis continuis obruatur, idcirco notum facimus presentium inspectoribus tam presentibus quam futuris, quod nos ex testimonio fidedigno et laudabili invenimus, quod ecclesia nostra sancti Johannis Constantiensis temporibus ab antiquis talem unionem societatem et ordinacionem ac tale mutuum commercium cum monasterio in Wagenhusen³ prope Stain⁴ Constantiensis diocesis in servis et ancillis eorum invicem matrimonia contrahentibus, ut mulier virum sequatur et eidem ecclesie seu monasterio, cui vir contrahens pertinuit et pertinet, mox post celebrationem matrimonialis contractus aproprietur et in servitutem ecclesie vel monasterii, cui eius vir, cum quo matrimonium contraxit, pertinuit et pertinet, redigatur, que unio societas ordinatio et mutuum commercium in locutione vulgari nuncupantur ain genosschafft seu genosami⁵, et qua societate et commercio mutuo ecclesia Constantiensis cum monasterio Augie Maioris⁶ et monasterio sancti Galli ac pluribus aliis ecclesiis et monasteriis gaudet, habuit habet et habere debet cum prefato monasterio in Wagenhusen. Et ne aliqua in futurum circa unionem et societatem, de quibus est premissum, valeant litigia suboriri, approbando unionem societatem ordinationem et mutuum commercium, de quibus predicitur, astrinximus nos ecclesiam nostram sancti Johannis predictam nostrosque successores in dicta ecclesia universos ad perpetuam et inviolabilem observationem unionis societatis et ordinacionis ac mutui comercii predictorum et astringemus per presentes servatis servandis et sollempnitatibus verborum et gestuum debitis et consuetis adhibitis in premissis. Et in testimonium omnium premissorum nos thesaurarius ac cantor totumque capitulum ecclesie sancti Johannis Constantiensis presentes litteras sigillo nostri capituli communitas tradidimus abbati et conventui dicti monasterii in Wagenhusen, qui et nobis ac ecclesie nostre predicte consimiles tradiderunt. Dat. Constantie anno domini millesimo trecentesimo sexagesimo tercio, ind. prima, pontificatus sanctissimi in Christo patris domini Vrbani pape quinti anno primo, XIII kln. mensis februarii.

Source Fulltext: Chartularium Sangallense VIII, Nr. 4848, S. 62-63.