Wir der vogt vnd der rat ze Rapreswille¹ tůn kunt mit disem brief vmb die sto^ezze misshelli vnd ansprach, so die erbern lúte Bilgri Russinger, Anna von Zollicon², Berchtolt Ple^atsche vnd V^olrich der Stolle vnser burgere hant || mit etzlichen burgern von Winterthur³ Egbrecht Ne^agellin, Cůnrat, Johans den Salern, Johans dem Balster zů Margreten Ste^ahellin von Winterthur vnd mit Eberhart Ste^ahellin, daz wir dar vmb mit dem schulthaizzen vnd dem rat ze Winterthur || von ir vnd ir burgere wegen ains satzes liepplich vnd gu^ettlich v´berain komen sijen, also daz wir der selben sachen getrúwot haben dem erbern beschaiden Petern von Ebersperg⁴, vnd daz man von ietwederm tail zwen erber man zůtz im || setzen sol, vnd daz er ain fúnftman haissen vnd sin sol vnd o^vch gewalt haben sol, vrtailen ze fragenne vnd tag ze gebenne an gemain stette ane geuerde. Vnd súlnt die fúnf vor an verho^eren baider tail ansprach rede vnd widerrede mit briefen vnd ane brief, als ie den man dunkt, des er geniessen welle oder súlle. Wenne o^vch si die sachen also von baiden tailn verho^erent, so mugent si vmb allú stuk minne sůchen, vnd weles stuck si ze minnen verrichten mugen, daz sol o^vch also bliben. Aber weles stuk si mit den minnen nit verrichten mugent, da súlnt die fúnf ain recht vmb sprechen, vnd wes si sich denne erkennent nach dem rechten ald der mertail vnder in, da bi sol o^vch daz ste^atte beliben. Vnd sol enhain se^acher da wider fúrbas nit tůn weder mit gerichten noch ane gerichte noch mit enhainen sachen, won daz er es ste^atte haben sol ane geuerde. Vnd súlnt o^vch die sachen vnd die sto^ezze vff dien fúnfen ain vstrag nemen vnd haben hinnan ze vsgander phingstwochen der nehsten, so nu kunt, ane geuerde, es were denne, daz es sich verzuge mit vrtailen oder mit zúgnúst ald daz den fúnftman oder der se^acher ain oder me ehaft not ald redlich sachen irrtin ane geuerde, daz sol o^vch den se^achern enwederhalb in kain wise schade sin. Es ist o^vch gedinget, were daz twedere tail siner schidman ainen ze fúrlegger nemen wo^elte, daz er daz wol tůn mag, vnd o^vch ietweders tails schidlúte an sin rat gan mugen. Were o^vch, daz sich daz also fůgti, daz twederm tail sin schidlúte ain oder baide zů sinen tagen nit han mo^echte, der sol vnd mag ander als schidlich dar setzen ane geuerde. Were o^vch, daz die se^acher von Winterthur kam burger von Rapreswille namdin ze zúgen vor dien fúnfen, wo^elten die zúge oder der zúge nit gehorsam sin ze sagenne, so sol sú der vogt vnd der rat da selbs wisen, daz sú ain warhait sagen, als verre si es wissen, als sich die fúnf erkennen ald der mer tail vnder in, daz selb sol o^vch dien se^achern von Rapreswille bedinget sin, ob si also thain burger von Winterthur ze zúgen namden vnd die zúge, ir were ainer oder me, nit gehorsam sin wo^elten ze sagenne, daz sú o^vch der schulthais vnd der rat da selbs wisen súlnt, daz si ain warhait sagen, als verre sis wizzen, als sich die fúnfe erkennen ald der mer tail vnder in, ane geuerde. Es hant o^vch die vorgenanten se^acher gesworn gelerte ayde ze den hailigen, den vorgeschriben satz vnd stuck ste^ate ze habenne vnd ze volfu^erenne in aller wise, als vorgeschriben ist, ane geuerde. Vnd súlnt e^achte vnd benne vnd dú gerichte, so die selben von Winterthur vff lantgerichten vber ir gůt erlanget hatten, absin. Es ist o^vch beredt vnd gedinget, daz die vorgenanten se^acher von Rapreswille vff dem ersten tag, so man vmb dis sach laistende wirt, bi dem ait, so si gesworn hant, dien obgenanten von Winterthur v´ber dú buntnúst der ayde, als vorbeschaiden ist, trostunge geben súlnt, als sich die erbern manne Peter von Ebersperg, Růd. Schulthais von Winterthur vnd Johs. Hegdorn von Rapreswille erkennent ald der mertail vnder in, was inen vor dien fúnfen geualle mit dien minnen oder mit dem rechten, daz o^vch daz also ste^atte blibe vnd volfu^eret werde ane geuerde. Daz selb son o^vch die se^acher von Winterthur dien von Rapreswille tůn ane geuerde. Es hat o^vch der vorgenant Peter von Ebersperg der fúnftman gesworn ainen gelerten ait zů dien hailigen, dú sach also ze verho^erenne vnd vszerichtenne, als vorgeschriben stat, ane geuerde. Weli o^vch denne ze schidlúten gesetzet werdent zů dem vorgenanten Petern von Ebersperg, die súlnt o^vch swerren, die sachen ze verho^erenne vnd vszerichtenne, als vorbeschaiden ist, ane geuerde. Es were denne, daz der schidlúten ainer oder me von twederm tail abgienge oder da bi nit sin wo^elte oder mo^echte, der sol vnd mag ander schidlúte dar setzen, als dick es ze schulden kunt, die sich o^vch des verbinden, als vorgeschriben ist, ane geuerde. Es ist o^vch beredt, were daz thain schidman oder si alle notdúrftig dunkti nach der fúrlegunge sich ze bedenkenne, die mugent sich bedenken nach der fúrlegung acht tag, vnd wenne sich die schidlúte bedenkent, weli sach denne vff den fúnfteman kunt, der sol sich acht tag dar nach bedenken, ob es in notdúrftig dunket, vnd o^vch nit lenger, ane geuerde. Der vorgenant Eberhart Ste^ahelli hat o^vch gesworn ainen gelerten ait zů dien hailigen, dú vorgeschriben sach ste^atte zehabenne vnd ze volfu^erenne in aller wise, als vorgeschriben stat, vnd sinen brief mit sinem aigen insigel dar v´ber ze gebenne. Were aber, daz sich die vorgenanten Peter von Ebersperg, Růdolf der Schulthais vnd Johs. Hegdorn erkandin ald der mer tail vnder in, daz er mer trostung geben so^elte vff dem ersten tag, so man vmb dis sachen tag laistende wirt, daz sol er tůn, er swerre denne zů dien hailigen, daz er dú trostunge nit han muge, so sol es bi dem ait vnd bi dem brief bliben, als er vor gesworn hat, ane geuerde. Es hat o^vch Egbrecht Ne^agelli genemmet, die so er ze Rapreswille ansprechig hat, dú statt gemainlich ze Rapreswille, Johs. von Langenhart⁵, Annen von Zollicon, Berchtolt Ple^atsch, Johs. Gamelstain, Berchtolt den Chal, Otten von Rambach, ain Stuider an Kilchhalden⁶, Herman Sumber von Jonen⁷, V^elin Cherer vnd Bertschin Widmer, so hant die Salerre vnd Eberhart Ste^ahelli genemmet dú statt gemainlich, dú Russingerin, Bilgrin Russinger, V^olrich Po^etswille vnd sin Wirtinnen, V^olrich Stollen, Albr. den Zwijer, Ru^edin Bo^etswiller, Johs. Hegdorn, V^olrich Windegger vnd Ru^edin Zehender, so hat Bilgri Russinger genemmet, die er ze Winterthur ansprechig hat, Cůnr., Johs. die Salerre, Johs. den Balster, Margreten Stehellin, vnd von Annen wegen von Zollicon wart genemmet Egbrecht Negelli, Berchtolt der Ple^atsch namde o^vch Egbrecht Ne^agellin. Were o^vch, daz twedere tail thains vngenemmet vergessen hette, an den er ze klagenne hat, den sol man nu zů dem nehsten tag, so man vmb dis sach tag laistende wirt, vor dien fúnfen nemmen vnd si dar nach vff den andern nehsten tag fúr die fúnf bringen, daz si o^vch volfu^eren, als o^vch die andern se^acher in der sach getan hant, ane geuerde. Were o^vch, daz von twederm tail von thainem se^acher kain vordrunge oder ansprach fúr die fúnf braht wurde, da die fúnfe oder den mer tail vnder in dunkti, daz es vnzitlich vnd vnredlich were, da súlnt si von lazzen, ane var. Vnd des ze vrkúnde haben wir der rat ze Rapreswille durch vnsers vogtes be^atte willen fúr v´ns vnd die vorgenanten vnser bůrgere vnserre statt insigel gehenkt an disen brief. Der geben wart an sant Agten tag nach Kristi geburt drúzehenhundert iar vnd im vier vnd sechtzigesten iare.

Source Fulltext: Chartularium Sangallense VIII, Nr. 4918, S. 114-117.