Allen^a) den, die disen ga^egenwúrtigen brief ansehent oder ho^erent lesen, kúndent wir Eberhart ab der Lo^vben¹ burger ze || Liehtenstaig² vnd Eberhart Dyethelrns Zwenrnans sa^eligen sun ab der Lo^vben vnd verjehent offenlich mit disem brief, das wir || gesund libes vnd můtes vnd mitt verdahten sinnen fúr v´ns vnd alle v´nser erben hern Johansen vnd Clausen gebrůdern, die man || nemt die Kobler von Alstetten³, vnd iren erben zeko^vffent gent vnd gegen hant reht vnd redlich fúr lidig vnd los an alle ansprach ain hofstat mitt dem hus, das sú uff der selben hoffstat gebuwen hant an der ringmůr gelegen ze Mayenuelt⁴ in der statt in der hofraiti, dú wilent A^ellú Triyaxen sa^eligen was, zw´schen v´nserm dem grosen stainhus vnd únserm stadel alle(n), stoset vnnen Rin habs^b) an des abps hus von Pfa^euers⁵ vnd an Werlis Wichlis hus, Dis vorgenemten hus vnd hoffstat mitt weg vnd mitt stegg, wi^e sú sin nottúrftig sint, obenan gen der kirchen da gelegen dur die ob genemten hoffraiti us vnd in ze ga^ende vnd zeuarn vnd mit gladnan^c) wegen vnd vngeladenan zů den vorgeschribenen hus vnd hoffstat an alle geua^erd ga^ebent wir die obgenanten Eberharten a der Lo^vben vnd haint gegen fúr v´ns vnd alle v´nser erben den obgenanten hern Johansen vnd Clausen Coblern gebrůdern vnd iren erben mitt allen rehten zeko^vffend fúr ledig vnd los an alle ansprache vnd als wir es da her gehebt habint vmb sechs pfund gůter gena^emer Czostentzer pfenning vnd fúnf schilling, der wir gantzlich von inen gewert sint vnd in v´nsern redlichen nutz bekert hant. Wir habent o^vch inen disen vor geschriben ko^vf geuertgot vnd die vor genemten hoffstat vnd hus uf gegen vor v´nserm gena^edigen herren dem edeln grauen Fridrichen von Tockenburg⁶ dem eltern, von dem es lehen ist, in sin hant, der es von v´ns vf genomen hat vnd inen es durch v´nser bett willen mit allen rehten, als vor geschriben stat, willenclich vnd gern gelihen hat. Alsus habent wir v´ns vnd vnser erben ezigen vnd ezihent vns aller der ansprach, so wir gen innen vnd iren erben jemer mo^ehtint gewinnen an die vorgenenten hoffstat vnd hus in kainerlaiye wise von lehentschaft von aigenschaft von zinsen ald wie es innen scha^edlich wa^er, an alle geua^erd. Wir vnd v´nser erben so^ellint o^vch ir vnd iren erben gůt wer sin vmb den obgeschriben ko^vf hoffstat vnd huses an gaistlichen vnd an weltlichen gerichtem^b), gen wem sú sin jemer bedurfent ald nottúrftig werdent, an alle geua^erd. Wir graf Fridrich von Tockenburg der elter dur bett willen Eberhartz a der Lo^vben, Eberhart sins suns, Eberhartz Diethelms Zwenmans sa^eligen suns, lihent wir vnd haint gelihen den beschaiden hern Johansen v´nserm kappelan ze Mayenuelt, Clausen sinem brůder dem Cobler vnd iren erben dis ob genemten hoffstat vnd hus mit allen rehten, als hie ob geschriben stat vnd gedinget ist. Des ze vrkúnd der warhait gebent wir inen v´nser insigel an disen brief. Ich Eberhart ab der Lo^vben vergich och, war vnd sta^et ze habent aller der dingen vnd gedingen, so hie ob an disem brief stat, vnd des ze ainer ganzer sicherhait henk ich o^vch min aigen insigel an disen brief. Ich der ob genant Eberhart Dyethelms Zwenmans sa^eligen sun a der Lo^vben, wan ich ze disen ziten aigens insigels nút enhan, so bind ich mich hinder mines vorgenemten vetterns insigel Eberhartz a der Lo^vben, o^vch war vnd sta^ett zehaben alles, so an disem brief geschriben stat vnd gedinget ist. Dir brief ist geben, do man zalt von Cristus gebúrt drúzehenhundert jar, darnach in dem vierden vnd sechzigosten jar, an sant Agthen tag.

Source Fulltext: Chartularium Sangallense VIII, Nr. 4919, S. 117-118.