Allen den, die disen brief ansehent oder ho^erent lesen, kúnde ich Peter von Ebersperg¹ ein fúnftman in dirr sach vnd wir Růdolf Schultheiss vnd Heinr. der Schultheiss || von Wintertûr² schidlút von Egbreht Na^egellis wegen vnd wir Nycolaus von Bu^el³ vnd Johans Hegdorn schidlút von Annun von Zollikon⁴ wegen vnd verie||hen alle fúnf an disem brief vmb die vordrung vnd ansprach, so der erber from Johans von Langenhart⁵ in namen vnd an statt Annun von Zollikon, der vogt er ist, || hatt zů Egbreht Na^egellin von Wintertur vmb schaden vnd kostung, den dú selb Anna vnd ir vo^egt ald die von ir wegen kostung gehept hettint nâch dem v^ssprûch brief, den her Albreht von Bůchheim⁶ vnd her Růdolf Brûn ritter burgermeister Zúrich⁷ getan hattont, daran geschriben stat, weder tail den andern sûmti v´ber den v^sspruch an den gu^etern, die im v^sgesprochen wa^erint, das der dem andern tail, der gesûmt wa^er, sin kostung vnd schaden ablegen so^elt, vnd o^vch sprach, das Annun von Zollikon die vrteil geben wa^er, das si bi dem v^sspruch brief beliben so^elt, da wa^er si von Egbreht Na^egellis sûmung vnd v^ftribens wegen ze schaden komen vmb drú hundert guldin minr oder mê ân geua^erd, vnd batt ir den schaden abzelegenn, vnd als Egbreht Na^egelli da wider anspra^echig hatt die statt gemainlich ze Rapreswile⁸, darnach etzlich burger besunder daselbs vnd mit namen Berchtolt den Snepfen genant Bla^etsch vmb den zehenden ze Irgenhûsen⁹ vnd vmb ain tannholtz vnd o^vch Růdolfen Wetzel von Zollikon von etzlicher âht wegen, da veriehen wir, das wir einhelleklich v´berain komen sien vnd den vorgenanten Egbreht Na^egellin die burger vnd die statt ze Rapreswile vnd mit namen die êgenanten Annun von Zollikon zů den minnen lieplich vnd gu^etlich mit einander verriht habint vmb die vorgeschribenen sachen vnd vmb alle sto^ess, so sú mit einander gehept hant vntz vff disen húttigen tag, als dirre brief geben ist. Vnd haben v^sgesprochen vnd sprechen mit disem brief, das sú beidenthalb einrander gůt frúnd sin súllent vnd das die vorgeschriben drú hundert guldin von der kostung wegen, als vorbeschaiden ist, gegen Egbreht Na^egellin absin súllent, vnd das er der nû vnd hie nâch ledig sin sol vnd fúrbasser darumb nieman ze antwúrten haben sol. Wir sprechen o^vch, das da gegen alle die ansprachen absin súllent, die Egbreht Na^egelli zů dem vogt den burgern vnd der statt gemainlich ald sunderlich gehept mo^eht han alder hatt vntz vff disen húttigen tag, als dirre brief geben ist. Wir sprechen o^vch, das der êgenant Berchtolt Snepf von Egbreht Na^egellin an dem vorgenanten zehenden vnd o^vch an dem êgenanten tannholtz nû vnd hie nach vnbekúmbert beliben sol an geistlichem vnd an weltlichem gerîhte vnd in alle wîse ân alle geua^erd. Es sol o^vch Egbreht Na^egelli sinen willen darzů geben, ob der êgenant Růdolf Wetzel von Zollikon im selber von âht helffen wil, das das gen dem lantrihter sin gůter wille si, vnd sol in von der selben âht wegen niemer mê bekúmberren noch bekrenken ân alle geua^erd. Vnd des ze einem waren vrkúnd so han ich der obgenant fúnftman vnd o^vch wir die vorgenanten schidlút alle vier jeklicher sin insigel gehenkt an disen brief ân allain ich Johans Hegdorn, won ich eigens insigels nit enhan, so han ich erbetten den fromm bescheiden Johansen von Langenhart vogt ze Rapreswile, das er sin insigel fúr mich gehenkt het an disen brief, des o^vch ich der obgenant Johans von Langenhart vergich, das ich min insigel durch bette des vorbenemten Johansen Hegdorns gehenkt han an disen brief mir vnd minen erben vnuergriffenlich vnd vnscha^edlich. Dis beschach ze Wetzikon¹⁰ an dem na^ehsten ma^entag vor sant Vrbans tag in dem iâr, do man zalt von Cristus gebúrt drútzehenhundert vnd sêchtzig iâr vnd darnach in dem vîerden jâre.

Source Fulltext: Chartularium Sangallense VIII, Nr. 4937, S. 133-135.