Allen den, die disen brief ansehent oder ho^erent lesen, kúnde ich Berchtolt von Witikon¹, den man nemt Kâle, vndervogt² vnd wir der rât der statt ze Rapre||swile vnd veriehen offenlich an disem brief, das fúr v´ns kamen an offen gerîht dú erber bescheiden Anna von Zollikon Hermans seligen von Zollikon êlichú to^vhter || mit Johansen von Langenhart ir rehten erkornen vogt einunt vnd Johans Hegdorn in namen vnd an statt Egbreht Na^egellis andrunt, vnd veriach || da dú selb Anna mit ir êgenanten vogt vmb den schaden vnd kostung, als si von Egbreht Na^egellis wegen von Wintertur ir stiefvatter gro^eslich geschadgot wa^er vnd o^vch ir vo^egt ald die von ir wegen kostung vnd schaden gehept hettint nâch dem v^sspruch brief her Albrehts von Bůchheim vnd her Růdolfs Brûnen ritter burgermeister Zúrich, das si da lieplich vnd gu^etlich mit dem selben Egbreht Na^egellin vmb den selben schaden vnd kostung vnd mit namen vmb all sachen vnd ansprachen, so si zůtz im hatt oder gehan moht vntz vff disen húttigen tag, als dirre brief geben ist, gantzlich verriht wa^er, also das si noch kain ir erben noch nieman andra von ir wegen vnd an ir stat den êgenanten Egbreht Na^egellin noch kain sin erben vmb den selben schaden noch vmb kain ander sach vntz vff disen húttigen tag, als dirre brief geben ist, niemer angesprechen bekúmberren noch bekrenken so^elt weder mit geistlichem noch mit weltlichem gerihte noch mit enhainen andren sachen ân geua^erd, vnd entzêch sich der selben ansprachen mit ir êgenanten erkornen vogt frilich vnd ledklich an des êgenanten vndervogtes hant in des vorgenanten Johansen Hegdorns hant ze Egbreht Na^egellis handen, won er o^vch das vor dem fúnftman vnd den schidlúten an in gesetzt hatt, als geriht vnd vrteil gab vnd als v´ns vnd ander erber lút, die darumb gefragt wurden vnd erteilton vff den ey^d, důcht, das es billich kraft vnd maht hetti nû vnd o^vch hie nâch. Vnd des ze vrkúnd so han ich der vorgenant Berchtolt von Witikon min insigel nâch rehter vrteil vnd durch beider teile bette willen gehenkt an disen brief, darzů so haben o^vch wir der vorgenant rât ze Rapreswile der selben v´nser statt insigel ze mêrer sicherhait gehenkt an disen brief, ich Johans von Langenhart der êgenanten Annun erkorner vogt vergich ain gantz wârhait aller der dingen, so an disem brief von mir vorgeschriben stant, vnd des ze vrkúnd der wârhait so han ich min insigel in vogtes wîse o^vch gehenkt an disen brief. Dies beschach ze Rapreswile in der statt an dem na^ehsten do^vnstag nâch sant Vrbans tag, do man zalt von Cristus gebúrt drútzehenhundert vnd sêchtzig iâr vnd darnach in dem vîerden jâre.

Source Fulltext: Chartularium Sangallense VIII, Nr. 4940, S. 137-138.