Allen den, die disen brief an sehent lesent oder ho^erent lesen, tůn ich Albreht von Lindenberg¹ schulthaiss ze Wil² kunt vnd vergih offenlich mit disem || brief, daz für mich kam ze Wil in der stat, da ich offenlich ze geriht sass an sant Andres tag, dú ersam frôw fro Elisabetha Peters von || Fridingen³ sailigen elichú tohter vnd Ha^enigis des Bo^eschen sailigen elichú hûsfrôw vnd Margareta ir tohter, vnd stalte sich die vorgenemt || Margareta mit Johans dem Bo^eschen burger ze Wil irem erbornen vogt, vnd offenoten die selb Elsbetha vnd Margareta ir tohter vnd Johans Bo^esch mit V^olrich von Trůngen⁴ irem fúrsprechen vnd sprachen, daz si baid von ir redlichen nôt wegen die vogtig gelegen ze Lomas⁵, die man nemt der Frien gůt, mit allen rehten nútzzen vnd gewonhaitten vnd mit allem dem, so von gewonhait vnd von reht zů der selben vogtig vnd darin geho^eret, fúr sich vnd ir erben redlich vnd reht verkoft vnd ze koffenn geben hettint fúr reht aigen dem fromen man Eberharten von Lomas vnd sinen erben, ob er enwa^er, vmb sehzehen pfunt haller gůter vnd gena^emer, vnd wa^eren ôch dero nach irem willen vnd nach ir vergiht gar vnd gantzlich von im gewert vnd wolten sich der selben vogtig verzihen vertegon vnd vfgeben nach reht, vnd baten mich vorgenemten rihter ze erfarn mit fúrsprechen, wie si daz tůn solten, daz ez kraft hett vnd haben mo^eht nû vnd hernach. Do fragt ich vmb vnd wart mit gesamnoter vrtail ertailt, daz dú vorgenemt Elsbetha solte stan mit irem erbornen vôgt, dez antwúrt si mit fúrsprechen vnd sprach, daz si dez nû ze mal nit haben mo^eht. Do fragt ich vmb, waz nû reht wa^er. Do ward ertailt, wo si dez swu^er, daz si ir vogt nit haben mo^eht, daz si daz geriht beuôgten solte. Do swur dú vorgenemt Elsbetha ainen gelerten aid ze den hailigen mit vfgehebter hand, daz si iren vogt do ze mal nit haben mo^eht. Do wart si mit reht vnd mit vrtail beuôgtet mit dem fromen man Růdolf von Liehtenstaig⁶, die vogtig ich im verleh nach dez landez sitten vnd gewonhait vmb dise sach. Do baten mich die vorgenemten Elsbetha von Fridingen vnd Margareta ir tohter mit den vorgenemten iren vo^egten aber ze eruarn, was nû reht wa^er. Do fragt ich vmb vnd wart ertailt, wo si mit iren vnd der vorgenemten iren vo^egten handen daz ta^etin mit dez gerihtez stab, daz ez also wol kraft hett nû vnd hernach. Do giengen die vorgenemten Elsbetha von Fridingen vnd Margaret ir tohter mit Johans dem Bo^eschen vnd Růdolf von Liehtenstaig iren vo^egten dar vor offem geriht vnd griffen gemainlich an den stab vnd vertegoten vnd gaben do ledklich vf mit dem stab die vorgenemten vogtig ze Lomas mit allen rehten vnd nútzzen vnd mit aller zů geho^erd, als reht waz vnd mit gemainer vrtail ertailt wart, in dez vorgenemten Eberhartz von Lômas vnd siner erben hand vnd verzigen sich do vor geriht vnd hant sich verzigen mit den vorgenemten iren vo^egten aller aigenschaft aller lehenschaft aller manschaft aller kuntschaft aller besazzung aller gewer lút vnd brief alles erbes vnd erbschaft aller zúgnust aller reht rehtung vordrung vnd ansprach, so sú an der zů der vnd von der vorgeschriben vôgtig wegen ie hatten ald noch iemer gewinnen mo^ehten vff gaistlichem vnd vff weltlichem geriht oder an reht ald mit kainen andren sachen. Es hant ôch die vorgenemten Elsbetha vnd Margareta gelobt, der vorgeschriben vogtig vnd och des kofs wer ze sinne fúr reht aigen, fúr sich vnd alle ir erben nach reht gen maniglichem, wenn wa vnd wie dik sin Eberhart von Lomas ald sin erben bedurfent vnd notdúrftig sint, an alle geuerd, vnd do bat im Eberhart von Lomas brief hie vmb, die wurden im ôch ertailt. Vnd dez ze ainer warhait aller diser ding henk ich Albreht von Lindenberg da vorgenemt min insigel von dez gerihtes wegen an disen brief, dar nach veriehen wir die vorgenemten Johans Bo^esch vnd Růdof^a) Liehtenstaig der vorgenemten frowen vo^egt in dirre sach vnd ich V^olrich von Trůngen fúrsprech ain gantz warhait aller diser vorgeschriben ding, vnd dez ze ainer warhait henken wir ôch v´nsri insigel an disen brief. Der geben ist ze Wil in dem iar, do man zalt von Cristus gebúrt drúzehenhundert iar, sehzig iar, dar nach in dem vierden iar, an dem vorgeschriben sant Andres tag.

Source Fulltext: Chartularium Sangallense VIII, Nr. 4969, S. 160-162.