Allen^a) den, die disen brief an sehent lesent oder ho^erent lesen, tůn ich Cůnrat Koler kunt vnd vergih dez offenlich mit disem brief fúr mich vnd alle min erben vnd nachkomen, daz || ich von miner redlichen nôt wegen den aker gelegen nebent Wilmatt¹, der da anwandet ainhalb an der Trůngerinen aker vnd gelegen ôch ainhalb an der Zenggen||berginen aker, mit allen rehten nútzzen vnd mit aller zů geho^erd redlich vnd reht verkoffet vnd ze kôffenne geben han fúr reht aigen der kilchen ze Rikkenbach² || vmb vier pfunt pfenning allez gůter vnd gena^emer Costenzer múns, dero ich gar vnd gantzlich bin gewert vnd minen nutz vnd fromen mit geschaffot han, vnd dar vmb han ich vorgenemter Cůnrat Koler mich verzigen fúr mich vnd alle min erben vnd nahkômen vnd verzihe ôch mit disem brief des vorgeschribenen akers aller aigenschaft aller manschaft aller kuntschaft aller gewer lút vnd brief aller vordrung vnd ansprach aller rehtung vnd reht, so ich dar an dar zů vnd da von ie hatte gewan ald nôch hinnanhin iemer gewinnen mo^eht, vnd daz ich noch enkain min erben die vorgeschriben kilchen ze Rikkenbach noch die, die denn kilchmaiger da sint, niemer so^elint ansprechen bekumberren nôch bekrenken vf triben sumen nôch ierren von des vorgenemten akers wêgen weder mit reht nôch an reht noch mit enkainer laig ander sach. Ich Cůnrat Koler da vorgenemt han ôch gelobt vnd loben mit disem brief fúr mich vnd alle min erben, des vorgeschriben akers vnd ôch dez kôfs wer ze sinne fúr reht aigen nach reht, wenn wa vnd wie dik sin die vorgenemt kilch ze Rikkenbach oder die, die kilchmaiger da sint, bedurfent vnd notdúrftig sint vff gaistlichem vnd vff weltlichem geriht, an alle geuerd. Vnd dez ze ainer warhait vnd offem vrkúnd aller diser vorgeschribener ding vnd bedingde, won ich Cůnrat Koler da vo[rgenemt]^b) aigens in[si]gels^b) nit enhan, so han ich gebetten den fromen man Albrehten von Lindenberg schulthaiss ze Wil³, daz er sin insigel fúr mich gehenket hat an disen brie[f]^b). Ich Albreht von Lindenberg schulthaiss ze Wil vergih offenlich an disem brief, daz Cůnrat der Koler dise sach offenlich vor mir veriehen vnd vollefu^ert hat, vnd von siner ernstlichen bett wegen han ich min insigel gehenket an disen brief. Der geben ist ze Wil in der stat in dem iar, do man zalt von gottez gebúrt drúzehenhundert iar, sehzig iar, dar nach in dem vierden iar, an der na^ehsten mitwůchen vor aller hailigen tag.

Source Fulltext: Chartularium Sangallense VIII, Nr. 4965, S. 157-158.