Allen^a) den, die disen brief an sehent lesent oder ho^erent lesen, tůn wir die nahgenemten V^olrich vnd Hainrich von Lo^enberg gebrůder vnd aber Hainrich wilent Johans von Lo^enberg¹ sailigen ires || brůder sûn kûnt vnd veriehen offenlich mit disem brief, daz wir alle drie gemainlich von v´nser redlichen not wegen die schůppos gelegen ze Rikkenbach², die man nemt Johans Gesers schůppos, || mit allen rehten nútzzen vnd gewonhaitten vnd mit allem dem, so von reht vnd von gewonhait zů der selben schůppos vnd darin geho^erent, fúr v´ns vnd alle v´nser erben redlich || vnd reht verkoft vnd ze koffenne geben haben dem frômen kneht Johans V^elis von Rikkenbach vnd sinen erben, ob er enwa^er, vmb drúzehen pfunt pfenning^b) gůter Costenzer múns, dero wir nah v´nserm willen gar vnd gantzlich von im sien gewert vnd v´nsern nûtz vnd fromen mit geschaffet haben, die selb schůppos v´nser lehen gewesen ist von dem erwirdigen gotzhus ze sant Gallen, dannen wir sie im geuertegot haben, als reht sitte vnd gewonlich waz. Vnd darûmb so haben wir v´ns alle drie verzigen vnd verzihen v´ns mit disem gegenwúrtigen brief fúr v´ns vnd v´nser erben vnd nahkômen aller aigenschaft aller manschaft aller lehenschaft aller kuntschaft aller gewer lút vnd brief alles erbes vnd erbschaft aller zúgnúst aller besatzzung aller reht rehtung vordrung vnd ansprach, so wir an dem zů dem vnd von der vorgeschriben schůppos wegen ie hatten ald noch hinnenhin iemer gewinnen mo^ehten mit gaistlichem ald mit weltlichem geriht oder an reht ald mit kainer laig ander sach, vnd daz wir noch v´nser erben noch nieman andre von v´nsren wegen noch an vnser stat den selben Johansen V^elis noch sin erben von der vorgeschriben schůppos wegen niemer me so^elin noch wellin ansprechen vftriben bekúmberrôn bekrenken noch in kain wis beswa^erren weder mit reht noch an reht sust noch so. Wir die vorgenemten V^olrich, Hainrich vnd aber Hainrich von Lo^enberg haben och gelobt fúr v´ns vnd v´nser erben vnd nahkomen, der vorgeschriben schůppos vnd och dez kofs wer ze sinne nah reht gen aller mainglich vnd och den selben Johans V^elis vnd sin erben darûmb an allen stetten an iren schaden ze versprechenn vnd ze versta^enn vff gaistlichem vnd vff weltlichem geriht, wenn wa vnd wie dik sú darumb angesprochen geschadgot vnd vfgetriben werdent, an geuerd. Vnd ze ainer warhait vnd offem vrkúnd aller diser vorgeschribener ding vnd bedingde henken wir V^olrich, Hainrich vnd aber Hainrich da vorgenant v´nsri insigel fúr v´ns vnd vnser erben vnd nahkomen an disen brief. Der geben ist ze Wil³ in der stat in dem iar, do man zalt von gottez gebúrt drúzehenhundert iar, sehzig iar, darnah in dem fúnften iar, an dem zinstag in den ostran.

Source Fulltext: Chartularium Sangallense VIII, Nr. 4981, S. 172-173.