Allen^a) den, die disen brief ansehent lesent oder ho^erent lesen, kúnd ich Růdolf Spiser der elter vnd vergich offenlich mit disem brieue fúr mich || vnd alle min erben, daz ich von miner redlicher nôt wegen vnd mit gůter vorbetrahtung daz gůt gelegen ze Obrawîlle¹ an dem Hônuirst², || daz min reht ledig aigen waz, vnd die vogtye v´ber daz selb gůt ze Obrawîlle mit akkern mit wisen mit wasen mit zwi mit holtz mit veld || mit allen rehten nútzzen vnd gewonhaiten vnd mit allem dem, so von reht ald von gewonhait zv^o dem selben gůt vnd vogtye geho^ert, waz daz ist, wâ ez gelegen ist ald wie ez genemt ist, redlich vnd reht verko^vft vnd ze ko^vffenn geben han dem beschaidenn manne Jacob Růpreht Albreht Vo^elis tohterman burger ze sant Gallen vnd sinen erben, ob er enwa^er, vmb drissig phunt vnd vrnb aht phunt phenning gůter vnd gena^emer Costentzzer múnse, der ich gantzlich von im gewert bin vnd enphangen han vnd an minen offenn nutz bekêrt, daz selb vorgeschriben gůt ze Obrawîlle han ich dem egenemten Jacob Růpreht mit der vogtye dez selben gůtes mit allen rehten vnd mit aller zv^o geho^erde fúr ain reht ledig aigen v^f geben vnd ze sinen handen geuertgot reht vnd redlich, alz reht sitte vnd gewonlich waz vnd alz ez kraft vnd maht sol vnd mag han. Vnd darumb so han ich mich willeklich verzigen vnd verzieh mich mit disem brieue gantzlich vnd gar fúr mich vnd alle min erben dez vorgeschribenen gůtes vnd vogtye ze Obrawîlle mit aller zv^o geho^erde aller aigenschaft aller manschaft aller kuntschaft aller gewêr lút vnd brief alles gaistlichen vnd weltlichen rehtes aller vordrung vnd ansprâchen aller reht vnd rehtung, so ich vnd min erben an dem zv^o dem vnd von dez vorgeschribenen gůtes vnd vogtye wegen ie gehept habent ald noch hinnenhin iemer gehaben oder gewinnen mo^ehtint, vnd daz ich noch enkain min erben noch nieman andre von v´nsern wegen noch an v´nser stat den vorgenemten Jacob Růpreht noch dekain sin erben noch nâchkomen von dez vorgeschribenen gůtes noch vogtye wegen ze Obrawîlle niemer mê sullent noch wellent ansprechen v^f triben bekúmberren bekrenken noch in kain wîs beswa^eren weder mit reht noch ân reht noch mit enkainer lay ander sache, ân alle geua^erde. Ich der obgenant Růdolf der Spiser han o^vch gelobt mit miner trúwe vnd loben mit disem brieue fúr mich vnd alle min erben, dez vorgeschribenen gůtes vnd vogtye ze Obrawîlle vnd o^vch dez ko^vffes fúr ain reht ledig aigen wer ze sinne nâch reht, vnd han im vnd sinen erben hierúber zv^o mir ze mêrer sicherhait ze wern geben Bilgrin Spiser minen vettern wîlunt burgermaister ze sant Gallen³, der hât im mit mir gelobt mit siner trúwe, dez vorgeschribenen gůtes vogtye vnd o^vch dez ko^vffes wern ze sinne nâch reht vnd o^vch den vorgenemten Jacob Růpreht vnd sin erben dar vmb ze versprechenn vnd ze versta^enne an allen stetten gen aller ma^englichem ân allen iren schaden, wenn wâ vnd wie dik sú darumb an gesprochen geschadgot oder v^f getriben werdent. Vnd mit namen so han ich vnd o^vch der obgenant Bilgri Spiser min vetter gelobt, wern ze sinne fúr Růdolf den Spiser minen sun, der in der gegen noch in dem land niht enist, wenn er ze land komi, daz er wider den vorgeschribenen ko^vff niht rede noch tu^e mit geriht noch ân reht, vnd daz er sich o^vch danne dez vorgeschribenen gůtes vnd vogtye ze Obrawille gen dem obgenanten Jacob Růpreht vnd gen sinen erben verzieh, alz dann reht ist vnd sú sin nôtdurftig sint. Ich han o^vch gelobt vnd loben mit disem brieue fúr mich vnd alle min erben, dem obgenanten Bilgrin Spiser minem vettern vnd sinen erben, ob er enwa^er, iren schaden gantzlich ab ze tu^enne, in den sú koment von der vorgeschribenen werschaft wegen, vnd han im vnd sinen erben vnd iren helffern darvmb o^vch erlo^vpt, mich vnd min erben ze phendenn vnd ze no^etenn an lúten vnd an gůt vff dem land vnd in den stetten mit geriht ald ân geriht ân klag vnd ân zorn, wie und wâ sú daz getůn mugent, alz vil vnd alz lang, vntz in der schad gantzlich ab gelait vnd vergolten wirt. Vnd ze ainem wâren vrkúnde vnd gantzzer sicherhait aller der vorgeschribenen dinge und gedinge so han ich Růdolf Spiser der elter da vorgenemt fúr mich vnd alle min erben min insigel gehenkt an disen brief. Ich der obgenant wer Bilgri Spiser vergich ain gantz wârhait aller der dinge vnd gedinge, so von mir an disem brief da vorgeschriben stânt, vnd ze mêrer sicherhait der selben dinge so han ich o^vch min insigel gehenkt an disen brief. Der geben ist ze sant Gallen an dem na^ehsten zinstag nach v´nser vro^vwen tag ze der liehtmisse in dem jâr, do man zalt von gottes gebúrt drúzehenhundert jâr, sehszig jâr vnd darnach in dem sehsten jâre.

Source Fulltext: Chartularium Sangallense VIII, Nr. 5012, S. 201-202.