Dilecto filio Vlrico dicto Burgower¹ rectori parrochialis ecclesie in Gossowe² Constantiensis diocesis magistro in artibus salutem etc. Litterarum scientia vite ac morum honestas aliaque probitatis et virtutum merita, super quibus apud nos fidedigno commendaris testimonio, nos inducunt, ut tibi reddamur ad gratiam liberales. Dudum siquidem omnes parrochiales ecclesias ceteraque beneficia ecclesiastica cum cura vel sine cura quorumcumque per assecutionem pacificam aliorum beneficiorum ecclesiasticorum quorumlibet per nos seu auctoritate nostra tunc collatorum et inantea conferendorum eisdem tunc vacantia et in posterum vacatura collationi et dispositioni nostre reservantes, decrevimus ex tunc irritum et inane, si secus super hiis a quoquam quavis auctoritate scienter vel ignoranter contigerit attemptari, et deinde beneficium ecclesiasticum cum cura vel sine cura ad dilectorum filiorum . . prepositi et capituli ecclesie Beronensis³ Constantiensis diocesis collationem provisionem presentationem seu quamvis aliam dispositionem communiter pertinens, si quod vacabat tunc vel cum vacaret, quod tu infra certi temporis spacium duceres acceptandam conferendam tibi post acceptationem eandem cum omnibus iuribus et pertinentiis suis donationi apostolice per nostras litteras reservavimus certis tibi super hoc executoribus^a) deputatis, volentes inter cetera, quod quamprimum vigore dictarum litterarum beneficium aliquod fores pacifice assecutus, parrochialem ecclesiam in Gossowe dicte diocesis, quam tunc temporis obtinebas quamque ex tunc vacare decreverimus omnino dimittere tenereris, prout in vestris litteris plenius continetur. Cum itaque postmodum tu vigore dictarum litterarum canonicatum et prebendam dicte ecclesie Beronensis ad dictorum . . prepositi et capituli collationem communiter pertinentes tibi collatos fueris pacifice assecutus et propterea dicta parrochialis^b) vacaverit et vacare noscatur ad presens nullusque preter nos hac vice de ea disponere potuerit neque possit reservatione et decreto obsistentibus supradictis. Nos volentes tibi in presbiteratus ordine constituto, qui ut asseris Parisiis⁴, postquam ibi in artibus magister fuisti, in sacra theologia pluribus annis studuisti et in ea adhuc studere desideras, premissorum meritorum tuorum intuitu gratiam facere specialem, dictam parrochialem ecclesiam, cuius fructus redditus et proventus secundum communem extimationem sex marcharum argenti valorem annuum ut asseris non excedunt, et que a dicta ecclesia Beronensi ultra decem miliaria ut asseris non distat, sie vacantem cum Omnibus iuribus et pertinentiis suis apostolica tibi auctoritate conferimus et de illa etiam providemus, decernentes, prout est irritum et inane, si secus super hiis a quoquam quavis auctoritate scienter vel ignoranter attemptatum forsan est hactenus vel contigerit imposterum attemptari, non obstante, si aliqui super provisionibus sibi faciendis de parrochialibus ecclesiis vel aliis beneficiis ecclesiasticis in illis partibus speciales vel generales apostolice sedis vel legatorum eius litteras impetrarint, etiam si per eas ad inhibitionem reservationem et decretum vel alias quomodolibet sit processum, quibus omnibus in assecutione dicte parrochialis ecclesie te^c) volumus anteferri, sed nullum per hoc eis quo ad assecutionem parrochialium ecclesiarium et beneficiorum aliorum preiudicium generari, seu si venerabili fratri nostro . . episcopo Constantiensi vel quibusvis aliis communiter vel divisim ab eadem sit sede indultum, quod ad receptionem vel provisionem alicuius minime teneantur et ad id compelli non possint, quodque de parrochialibus ecclesiis vel aliis beneficiis ecclesiasticis ad eorum collationem provisionem presentationem seu quamvis aliam dispositionem coniunctim vel separatim spectantibus nulli valeat provideri per litteras apostolicas non facientes plenam et expressam ac de verbo ad verbum de indulto huiusmodi mentionem, et qualibet alia dicte sedis indulgentia generali vel speciali cuiuscumque tenoris existat, per quam presentibus non expressam vel totaliter non insertam effectus huiusmodi nostre gratie impediri valeat quomodolibet vel differri et de qua cuiusque toto tenore habenda sit in nostris litteris mentio specialis seu quod predictos canonicatum et prebendam ecclesie Beronensis, quorum fructus redditus et proventus sexdecim marcharum argenti secundum extimationem predictam valorem annuum ut asseris non excedunt, nosceres obtinere. Nulli ergo etc. nostre collationis provisionis constitutionis et voluntatis infringere etc. Datum Auinione, VI. kl. februar. anno quarto.||
In eodem modo dilectis filiis . . abbati monasterii in Salem⁵ Constantiensis diocesis et . . Constantiensis⁶ ac . . sancti Agricoli Auinionensis⁷ ecclesiarum decanis salutem etc. Litterarum scientia etc. usque noscitur obtinere. Quocirca discretioni vestre per apostolica scripta mandamus, quatinus vos vel duo aut unus vestrum per vos vel alium seu alios eundem Vlricum vel procuratorem suum eius nomine in corporalem possessionem dicte parrochialis ecclesie ac iurium et pertinentiarum ipsius inducatis auctoritate nostra et defendatis inductum amoto exinde quolibet detentore, facientes sibi de ipsius ecclesie fructibus redditibus proventibus iuribus et obventionibus universis integre responderi, non obstantibus omnibus supradictis seu si eidem . . episcopo vel quibusvis aliis communiter vel divisim a prefata sede indultum existat, quod interdici suspendi vel excommunicari non possint per litteras apostolicas non facientes plenam et expressam ac de verbo ad verbum de indulto huiusmodi mentionem. Contradictores auctoritate nostra etc. Datum ut supra.

Source Fulltext: Chartularium Sangallense VIII, Nr. 5010, S. 198-200.