Ich^a) Růdolf von Roschach kylchunhêrre der kylchun ze Roschach¹ gemain man in der nâchgeschribenen sache tůn kunt vnd vergich offenlich mit disem brieue allen, || die in ansehent lesent oder ho^erent lesen, daz fúr mich kam ze Roschach in dem dorf an der na^ehsten mitwûchen vor dem hailigen tag ze ostran die êrsam in gotte || swester Engeltrût Kaltysnin priorin in der samnung bi der stat ze sant Gallen² an dez selben conuentes stat gemainlich von der sto^ess vnd ansprâchen wegen, || so Johansen vnd Haintzzen von Stainach³ gebrůder êlichen hûsfro^vwen vnd irú geswistrit zv^o den selben fro^vwen in der samnung hattent von dez klainen zehenden wegen v´ber allen den hof ze Frankenrúti⁴, da die selben von Stainach sprâchent von der vorgedâhten iro êlichen husfro^vwen vnd von iro geswistrit wegen, daz der selb klain zehend iro lehen wa^er von dem gotzhus ze sant Gallen, vnd aber die selben fro^vwen in der samnung da wider sprâchent, daz sú den selben hof ze Frankenrúti inne gehept hettint fúr ain reht aigen ân alle redlich ansprâchen vierzig jâr minder oder mêr, daz sú da von niht geben hettint dann den zehenden von den zwain kornen von vesan vnd von habern ie zv^o den zwain zelgan, so sú in nutz la^egint, vnd daz sú anders von dem selben hof niht verzehendet hettint. Der selben sto^ess vnd ansprâchen sú baidenthalb vff mich ze ainem gemainen man vnd vff diz nâchgenemten schidlút hern Eberhart von Sultzberg⁵ ritter, Růdolf den vogt von Wartense⁶, Bartholome den Blârrer vnd vff Jacob Růpreht Albreht Vo^elis tohterman ze dem rehten komen wârent. Vnd darumb o^vch der obgenant Johans von Stainach lobt mit siner trúwe, wer ze sinne fúr sin êlichen husfro^vwen, fúr Haintzzen sinen brůder, fúr sin êlichen hûsfro^vwen vnd fúr iro geswistrit, waz wir alle fúnf gemainlich ald der mêr tail vnder v´ns darumb spra^echint ald ich obgenanter gemain man ainig, ob die schidlút v´berain niht ka^emint, daz sú daz alles sta^et hettint vnd haben so^eltint nv vnd o^vch hie nâch. Vnd won dú vorgeschriben vrtail vff mich vorgenanten gemain man ainig komen waz, daz die obgenanten schidlút dar vmb v´ber ain niht komen mohten, do erkand ich mich nâch miner frúnde vnd nâch ander êrber lút rât vnd sprach vnd ertailt nâch dem rehten, wa die vorgenant priorin gesweren mo^eht vnd o^vch swu^eri ainen gelerten ait ze den hailigen mit v^fgehabnen vingern, daz sú den vorgeschribenen hof ze Frankenrúti inne gehept hettint fúr aigen alz lang, alz man ain aigen behaben sol mit der gewêr, vnd darzů zwên vnuersprochen man hett, die weder tail noch gemain an dem selben gůt hettint vnd v´ber die sú niht ze gebietenn hettint, die ir der gewêr hulffent vnd helffen mo^ehtint, daz sú dez billich geniessen so^eltint, vnd so^elt o^vch daz tůn vnd vollefu^eren ze drin tagen vnd sechs wuchen v^s ze Roschach in dem dorf. Vnd offenot o^vch do die obgenant priorin offenlich vor mir vnd vor den obgenanten Růdolf dem vogt schidman der vorgenemten von Stainach iro elichen husfro^vwen vnd iro geswústrit vnd vor Bartholome dem Blârrer schidman der obgenanten fro^vwen in der samnung vnd sprâch, alz ich obgenanter gemain man vmb die vorgeschribenen sach vnd ansprâch ertailt hett vnd darumb ich in o^vch vormals mit der vrtail baidenthalb tag geben vnd verkúnt hett, also wa^er o^vch si fúr mich vnd fúr die obgenanten schidlút Růdolf den vogt von Wartense vnd Bartholome den Blârrer komen vnd wo^elt da tůn vnd vollefu^eren, dez si got wol getrúwoti, alz ich gesprochen vnd ertailt hett. Vnd swůr o^vch do die obgenant priorin offenlich vor mir vnd vor den obgenanten schidlúten Růdolf dem vogt von Wartense vnd Bartholome dem Blârrer ainen gelêrten ait ze den hailigen mit v^fgehabenen vingern, daz sú den vorgeschribenen hof ze Frankenrúti fúr aigen inne gehept hettint alz lang, alz man ain aigen behaben sol mit der gewêr, vnd hatt o^vch darzů bi ir zwên vnuersprochen man, die weder tail noch gemain an dem selben gůt hattent vnd v´ber die sú o^vch niht ze gebietenn hattent, die ir der gewêr hulffent mit dem aide, alz ich gesprochen vnd ertailt hatt. Darnâch do bat mich die obgenant priorin darumb sprechen, sid si alles daz getân vnd vollefu^ert hett, daz ich gesprochen vnd ertailt hett, ob sú iht billich die vorgeschribenen sache behept hettint vnd ob sú hinnenhin von den obgenanten von Stainach von iren êlichen hûsfro^vwen vnd von iren geswistriten an dem selben klainen zehenden iht billich vnbekrenkt vnd vngemu^et beliben so^eltint. Darumb ich vnd o^vch die obgenanten zwên schidman Růdolf der vogt von Wartense vnd Bartholome der Blârrer alle drîe gemainlich sprâchen vnd ertailten, daz sú die selben sach behept hettint vnd daz sú o^vch hinnenhin von den obgenanten von Stainach von iren êlichen hûsfro^vwen vnd von iren geswistriden an dem vorgeschribenen klainen zehenden ze Frankenrúti billich vnbekrenkt vnd vngemu^et beliben so^eltint nv^ vnd o^vch hie nâch. Darnâch bat v´ns aber die obgenant priorin sprechen, ob ich in iht billich hierúber ainen brief geben so^elt besigelt mit minem insigel fúr mich vnd fúr die obgenanten schidlút. Darumb wir v´ns o^vch alle drige ainhelleklich erkandent vnd sprâchent vnd ertailtent nâch dem rehten, daz ich ez billich ta^et vnd tůn solt. Vnd ze ainem wâren vrkúnde vnd gantzzer sicherhait aller der vorgeschribenen dinge vnd vergiht so han ich Růdolf von Roschach kylchunherre da vorgenemt fúr mich vnd fúr die obgenanten schidlút Růdolf den vogt von Wartense vnd Bartholome den Blârrer min insigel gehenkt an disen brief. Der geben ist ze Roschach in dem dorf an der vorgeschribenen mitwûchen in dem jar, do man zalt von gottes gebúrt drúzehenhundert jâr, sehszig jâr vnd darnâch in dem sibenden jâre.

Source Fulltext: Chartularium Sangallense VIII, Nr. 5060, S. 241-243.