Allen^a) den, die disen brief an sehent lesent oder ho^erent lesen, kúnd ich Albreht von Lindenberg schulthaisse vnd rihter ze Wîl¹ vnd vergihe offenlich an disem || brief, daz ich an dem fritag in der pfingstwochun offenlich ze Wil in der stat ze geriht sasse vnd dz fúr mich dâ kament fúr geriht Hans von Arnolt||swille² der alt burger ze Wil mit Hansen, Hainrichen vnd Margarethun sinen elichen kinden vnd mit Burkart dem Kekken der selbun Margare||thun elichem man an ainem tail vnd Hans der Borhuser och burger vnd waibel ze Wil, vnd stalte sich da Hans von Arnoltswille der alt mit Hainrich dem Borhuser sinem fúrsprechen vnd offenot vnd veriâh dâ der obgenand Hans von Arnoltswille der alt mit sinem fúrsprechen, dz er mit gůter beschaidenhait vnd vorbetrahtung von siner nôt wegen den akker gelegen ze Wil vor der nidren vorstat, der sin reht aigen waz vnd gelegen ist zw´schent der strâsse vnd vrowun akker in der sa^emnung³, der vorgenand akker nu ain bongart vnd ain wise ist, mit aller zů geho^erde, so dar zů vnd dar in geho^eret, reht vnd redelich habe verkffet^b) vnd ze koffenn geben Hansen dem obgenanden Borhuser pfleger der veltsichun ze Wil⁴ in namen vnd an stat der selbun veltsichun vnd iro nahkomen vmb nún pfund pfenning gůter Costenzer múns, der selbun pfenning Hans von Arnoltswille der alt alleklich vnd gar gewert ist, als er da veriah vor offenem geriht, den vorbenempte akker^c), der nû ain bongart vnd ain wise ist, wo^elti Hans der alt Arnoltswille vnd sinú vorbenempten kind ledeklich vnd och gern v^f gen vnd och fúr reht aigen vertegen dem obgenanden Hansen Borhuser dero vorgeschribenun veltsiechun pfleger in namen vnd an stat vnd och ze nutz vnd ze handen der selbun veltsiechun vnd ir nahkomen, die denne ze Wil in dem sichhus gesessen sint vnd dar in enpfangen werdent von den pflegern des seben^b) siechhuses, vnd bat im Hans von Arnoltswille der alt erfaren an ainer vrtailde, wie er vnd sinú vorbenempten kind dz tůn so^eltint, daz es kraft vnd maht hetti nû vnd hie nâch. Do frâgt ich obgenander rihter vrtailde vmb, do ward ertailet mit gemainer vrtailde, dz Hans von Arnoltswille der alt, Hans, Hainrich sin sún mit iro handen vnd Margareth sin dohter mit Burkartz des Kekken ir elichen mannes willes vnd hand vnd och mit ir hand vnd och a^ellú mit des gerihtes stab den vorbenempten akker, der nû ain bongart vnd ain wise ist, ledeklich v^f gen ze rehtem aigen vnd sich des gar vnd gantzlich enzihen so^eltint in des obgenanden Hansen des Borhusers hand in namen vnd an stat der vorbenemptun veltsichun vnd zů dero selbun veltsiechun^d) nutz vnd handen vnd dz Hans von Arnoltswille der alt vnd sin erben des vorgeschribenen koffes vnd akkers fúr reht aigen reht wern so^ellint sin nâh reht an allen fúrzug vnd ân allen schaden der obgenandun veltsiechun, wenn ald wâ oder wie dik sin die vorbenempten veltsiechun ald ir pfleger, wa^er denne die sint, bedurfent ald notdúrftig sint ald hie nach bedurfunt werdent v^ff gaistlichem ald v^ff weltlichem geriht, dz habi wol kraft nû vnd hie nâch, do gieng Hans der Arnoltswille der alt, Hans vnd Hainrich sin sún vnd Margareth sin dohter vnd gabent dâ Hans der alt Arnoltswille vnd sin vorbenempten sún mit iro handen vnd die vorbenempt Margareth mit ir hand vnd mit ir obgenanden elichen mannes willen vnd hand den vorgeschribenen akker, der nu ain bongart vnd ain wise ist, mit aller zů geho^erde ledeklich v^f fúr aigen an des gerihtes stab vnd enzigent sich da des selben akkers mit aller zů geho^erde gar vnd gantzlich mit des gerihtes stab fúr reht aigen in des vorbenempten Hansen des Borhusers pflegers der vorbenemptun veltsichun hand in namen vnd an stat der selbun veltsiechun vnd zů iro nutz vnd handun, vnd lobtent och Hans von Arnoltswille der alt, Hans vnd Hainrich sin sún mit iro trúwan, dz sú vnd iro erben des vorgeschribenen koffes ân allen fúrzug vnd och des vorgeschribenen akkers ân alle wider rede reht wern sont sin nâch reht fúr aigen, wenne ald wâ oder wie dik sin die obgenanden veltsiechen oder ir nâhkomen ald iro pfleger, wer denne die sint, bedurfent ald notdúrftig sint ald hie nach werdent, vff gaistlichem ald v^ff weltlichem geriht ân allen schaden der obgenandun veltsiechun vnd iro nähkomen, vnd bat mich obgenanden rihter Hans der vorgenand Borhuser pfleger der vorgeschribenun veltsiechun ernstlichen, im in namen vnd an stat der selbun veltsiechun hier v´ber des gerihtes brief gen, ob es reht wer, der wart inan ertailet mit gemainer vrtaild, vnd sint a^ellú vorgeschribenen ding reht vnd redelich geschehen vnd vollefu^eret mit allen den worten werchen geba^erden vnd mit aller sicherhait, so dar zů nútz gůt ald notdúrftig waz von reht ald von gewonhait vnd als mit gemainer vrtaild wart ertailet. Vnd ze merer sicherhait aller vorgeschribener ding henk ich obgenander rihter vnd schulthaisse min insigel von des gerihtes wegen an disen brief. Wir Hans von Arnoltswille der alt, Hans, Hainrich vnd Margareth sinú elichú kind vnd Burkart der Kek der selbun Margarethun elicher man veriehint och offenlich ain gantz warhait aller der ding, so der vorgeschriben schulthaisse vnd rihter von v´ns an disem brief veriehen^e) het, vnd ze merer sicherhait der selben ding henken wir Hans der alt von Arnoltswille fúr mich vnd fúr min erben min insigel vnd ich Burkart der Kek min insigel fúr mich vnd fúr min obgenandun elichun wirtenn an disen brief, vnd won wir obgenanden Hans, Hainrich vnd Margareth aigener insigel nit habint, so bindint wir vorbenempten Hans vnd Hainrich von Arnoltswille gebrůder v´ns an disem brief vnder v´nsers vorgenanden vatters insigel, so bind ich vorgenandú Margareth vnder mines vorbenempten elichen mannes vnd vogtes insigel, a^ellú vorgeschribenen ding von v´ns an disem brief sta^et vnd war ze habenn. Dirr brief geben wart ze Wîl in der stat an dem fritag in der pfingstwôchun in dem jâr, do man zalte von Cristes gebúrt drúzehenhundert jâr, sehzig jâr, dar nach in dem sibenden jar.

Source Fulltext: Chartularium Sangallense VIII, Nr. 5071, S. 250-251.