Allen^a) den, die disen brief an sehent lesent oder ho^erent lesen, kúnd ich Burkart Túring von Tarrenbúrron¹ schůlmaister ze Wil² vnd vergih offenlich mit disem brief, das dú êr||wirdig frô Cristina a^ebtischinne ze Maggenôw³ von ir vnd des gemainen conuentes wegen ze Maggenôw sto^essig vnd misshellig was mit dem frômen man Růdo||lfen von Annwille⁴ von Byschoffzelle⁵ vnd er mit ir, das dú vorgenemt Cristina sprach, daz der zehend, so vff den nahgenemten akren vellet, die gelegen sint ze Sor||rendal⁶ in dem hof, vff den drin múlakren, der ainer gelegen ist vff dem múligraben, vff dem aker hinder dem stadel, vff dem aker genant der Schibelhag⁷, vff dem aker genant Hirstobel⁷, vff dem aker vnder dem Holtz⁸ vnd vff dem aker ob dem Môs⁹, daz der zehend zůgehôrte dem closter vnd dem vorgeschriben conuent ze Maggnôw, vnd hettint och den selben zehenden alweg dahêr vff den selben akren genômen. Do sprach der vorgenemt Růdolf Annwille, daz der zehend inen nút zůgehôrte vnd das die akren enkainen zehenden geben solten weder iro noch dem conuent. Der selben sto^ess kamen sú ze baiden tailnn vff mich ze ainem gemainen man vnd satzte ietwedre tail darumb zů mir zwen erber schidman. Wie wir fúnf ald das mêr vnder v´ns nach dem, als wir von baiden tailnn red vnd widerrede vnd kuntschaft von inen in gena^emin vnd verhorten, v´ns erkandin nah dem rehten vnd darûmb vs spra^echin, das es da bi beliben solte. Vnd nah baider tail rêd vnd wider rede vnd och gesworner kuntschaft, als sú fúr v´ns brahten vnd wir verho^ert haben, so han ich mich vorgenemter gemain man vnder v´ns fúnfen erfarn vnd haben v´ns des ainhelklich erkent vnd darumb vsgesprochen, das die vorgenemten frowen vnd der . . conuent ze Maggnôw den vorgeschriben zehenden vff den vorgenemten akren nû hinnenhin nemen vnd in volgen vnd werden sol růweklich vnd vngesûmet, vntz das es sich enpfindet mit ainer besser kûntschaft, als reht ist, das die vorgenemten akren nit zehenden gen so^ellin. Vnd do batt v´ns dú vorgenemt frô Cristina a^ebtischinne des vs spruches brief geben, die ertailten wir ir o^vch. Vnd ze ainer warhait vnd sta^eten sicherhait des vorgeschriben vs spruches han ich Burkart Túring gemain man in dirre sach min insigel gehenket an disen brief. Der geben ist ze Wil in der stat an sant Nyclaus abend in dem iar, do man zalt von gottes gebúrt drúzehenhundert iar, sehzig iar, darnah in dem sibenden jar.

Source Fulltext: Chartularium Sangallense VIII, Nr. 5106, S. 281-282.